கொரோனா சவால்களுக்கு மத்தியிலும் நாடாளுமன்ற அமர்வுகள் இன்று (செவ்வாய்க்கிழமை) காலை கூடுகின்றன.
இன்று முற்பகல் 11.00 மணி முதல் பிற்பகல் 4.30 மணிவரை 2015ஆம் ஆண்டு 05ஆம் இலக்க தேசிய மருந்துகள் ஒழுங்குபடுத்தும் அதிகாரசபை சட்டத்தின் கீழான இரண்டு ஒழுங்குவிதிகளும் மஹாபொல உயர் கல்விப் புலமைப்பரிசில் நம்பிக்கைப்பொறுப்பு நிதிய திருத்தச் சட்டமூலம் இரண்டாம் மதிப்பீடு என்பன விவாதத்துக்கு எடுத்துக்கொள்ளப்படவுள்ளன.
மேலும் இன்று தொடக்கம் 10ஆம் திகதி வரை தினமும் முற்பகல் 10.00 மணி முதல் முற்பகல் 11.00 மணி வரை வாய்மூல விடைக்கான கேள்விக்காக நேரம் ஒதுக்கப்பட்டுள்ளது.
அத்துடன் பெப்ரவரி 08 ஆம் திகதி முதல் 10ஆம் திகதி வரை தினமும் பிற்பகல் 4.30 மணி முதல் 4.50 மணிவரை சபை ஒத்திவைப்பு நேரத்தின்போதான கேள்விகளுக்காக நேரம் ஒதுக்கப்பட்ட்டுள்ளது.
அத்துடன், பி.ப 4.50 மணி முதல் பி.ப 5.30 மணிவரையான காலப் பகுதியில் சபை ஒத்திவைப்பு நேரத்தின்போதான பிரேரணை மீதான விவாதமும் இடம்பெறும் என அறிவிக்கப்பட்டுள்ளது.
அதேநேரம், பெப்ரவரி 11 ஆம் திகதி முற்பகல் 10.00 மணி முதல் பிற்பகல் 4.30 மணி வரை மறைந்த முன்னாள் அமைச்சர் மங்கள சமரவீர தொடர்பான அனுதாபப் பிரரேரணை மீதான விவாதத்தை நடத்துவதற்கும் தீர்மானிக்கப்பட்டுள்ளது.
இதற்கமைய அன்றையதினம் வாய்மூல விடைக்கான கேள்வி, ஒத்திவைப்பு நேரத்தின்போதான கேள்வி, சபை ஒத்திவைப்பு நேரத்தின் போதான பிரேரணை என்பவற்றுக்கு நேரம் ஒதுக்கப்படவில்லை
ஐம்பதிற்கும் அதிகமான நாடாளுமன்ற ஊழியர்கள் வைரஸ் தொற்றுக்கு உள்ளாகியுள்ளதுடன், 14 நாடாளுமன்ற உறுப்பினர்கள் வைரஸ் தொற்றினால் பாதிக்கப்பட்டு சுய தனிமைப்படுத்தலில் உள்ளனர்.
இந்நிலையில் இந்த வாரத்திற்கான நாடாளுமன்ற அமர்வுகளை கூட்டுவதற்கான தீர்மானம் எடுக்கும் கட்சி தலைவர்கள் கூட்டம் நேற்று பிரதி சபாநாயகர் ரஞ்சித் சியம்பலாபிட்டிய தலைமையில் கூடியது.
இதன்போது, கொரோனா சவால்களுக்கு மத்தியிலும் நாடாளுமன்றத்தை இன்று தொடக்கம் 11ஆம் திகதி வரை கூட்டுவதற்கு தீர்மானிக்கப்பட்டமை குறிப்பிடத்தக்கது.
