உக்ரைன் மீது படையெடுப்பதற்கான ரஷ்யாவின் முடிவு நேட்டோவின் ஆத்திரமூட்டும் நடவடிக்கைகளில் வேரூன்றியுள்ளது என்று ஈரானிய வெளியுறவு அமைச்சர் ஹொசைன் அமிரப்டோல்லாஹியன் கூறினார்
எவ்வாறாயினும், ஈரான் போரை ஒரு தீர்வாகப் பார்க்கவில்லை என்றும், அமிரப்டோல்லாஹியன் கூறினார். மேலும், நெருக்கடிக்கு அரசியல் மற்றும் இராஜதந்திர தீர்வுக்கு அழைப்பு விடுத்தார்.
உக்ரைனில் இருந்து ஈரானிய குடிமக்களை வெளியேற்றுவது குறித்து விவாதிக்க, கீவ்வில் உள்ள ஈரான் தூதரகத்தில் அதிகாரிகளுடன் தொலைபேசி அழைப்பை மேற்கொண்டதாகவும் அமிரப்டோல்லாஹியன் தெரிவித்தார்.
வெளிவிவகார அமைச்சின் செய்தித் தொடர்பாளர் சயீத் கதிப்சாதே ஒரு அறிக்கையில், குடிமக்களை வெளியேற்றுவதற்கு பிரத்யேக விமானத்தைப் பாதுகாக்க ஈரான்; செயற்பட்டு வருவதாகவும், நெருக்கடியான ஆபத்தான இடங்களில் இருந்து ஈரானியர்கள் விலகிச் செல்லுமாறும் அழைப்பு விடுத்தார்.
இதேபோல, கட்டாரின் எமிர் ஷேக் தமீம் பின் ஹமத் அல் தானிக்கு ஜெலென்ஸ்கியிடமிருந்து ஒரு தொலைபேசி அழைப்பு வந்துள்ளது, அவர் சமீபத்திய முன்னேற்றங்கள் குறித்து அவருக்கு விளக்கினார் என்று அவரது அலுவலகம் ஒரு அறிக்கையில் தெரிவித்துள்ளது.
ஷேக் தமீம் அனைத்துத் தரப்பினரும் நிதானத்தைக் கடைப்பிடிக்கவும், இராஜதந்திர வழிமுறைகள் மூலம் நெருக்கடியைத் தீர்க்கவும் அழைப்பு விடுத்தார். கத்தார் அமீரும் பொதுமக்களின் பாதுகாப்புக்கு அழைப்பு விடுத்தார்.
