ஸ்ரீலங்கா பொதுஜன பெரமுனவின் நாடாளுமன்ற உறுப்பினர்களுக்கு இடையில் அமைச்சுப் பதவிகளுக்காக கடும் போட்டி நிலவி வருவதாக அரசாங்க உள்ளக தகவல்கள் தெரிவிக்கின்றன.
இவர்கள் அவ்வப்போது ஜனாதிபதி மற்றும் பிரதமரை சந்தித்தும், வேறு தரப்பினர் ஊடாகவும் அழுத்தங்களை பிரயோகித்து இப்பதவிகளை பெற்றுக்கொள்ள முயற்சித்து வருவதாக கூறப்படுகிறது.
ஜனாதிபதி மற்றும் பிரதமர் உட்பட அமைச்சரவை 25 உறுப்பினர்களுடன் மட்டுப்படுத்தப்படவுள்ளதாக தெரிவிக்கப்படுகின்றது.
எவ்வாறாயினும், 23 அமைச்சரவை அமைச்சர்களில் 13 பேர் ஏற்கனவே பதவியேற்றுள்ளனர்.
ஸ்ரீலங்கா பொதுஜன பெரமுன கட்சிக்கு சுமார் 10 அமைச்சுப் பதவிகள் கிடைக்கவுள்ளதாக கூறப்படும் நிலையில், அதில் ஐந்து அமைச்சர்கள் ஏற்கனவே பதவிப் பிரமாணம் செய்து கொண்டுள்ளனர்.
ஸ்ரீலங்கா பொதுஜன பெரமுனவிற்கு இன்னும் ஐந்து அமைச்சு பதவிகளே எஞ்சியுள்ள நிலையில், அந்த பதவிகளுக்கு ஸ்ரீலங்கா பொதுஜன பெரமுனவை சேர்ந்த சுமார் 40 பேர் போட்டியிடுகின்றனர்.
நிமல் சிறிபால டி சில்வா, சுசில் பிரேமஜயந்த, விஜயதாச ராஜபக்ஷ, ஹரின் பெர்னாண்டோ, மனுஷ நாணயக்கார, நளின் பெர்னாண்டோ மற்றும் டிரான் அலஸ் ஆகியோர் ஏற்கனவே அமைச்சர்களாக பதவிப்பிரமாணம் செய்து கொண்டுள்ளனர்.
மீதமுள்ள அமைச்சரவை மற்றும் இராஜாங்க அமைச்சர்கள் இன்று(23) பதவியேற்பார்கள் என அரசாங்க உள்ளக தகவல்கள் தெரிவிக்கின்றன.
