பாலாவின் இயக்கத்தில் உருவாகிவந்த ‘வணங்கான்’ திரைப்படம் தற்காலிகமாக இடைநிறுத்தப்பட்டுள்ளமை யாவரும் அறிந்ததே!
இப்படத்தில் சூர்யா கதாநாயகனாக நடிக்க, தெலுங்கு இளம் நடிகை கிர்த்தி ஷெட்டி இப்படத்தில் நாயகியாக நடிக்க ஒப்பந்தம் செய்யப்பட்டிருந்தனர். இந்த படத்தை சூர்யாவின் 2டி என்டர்டெயின்மெண்ட் நிறுவனம் தயாரித்தது.
இந்த வணங்கான் படத்தின் முதல் கட்ட படப்பிடிப்பு 40 நாட்கள் கன்னியாகுமரியில் நடந்த நிலையில் அதன் பிறகு படப்பிடிப்பு நடத்தப்படவில்லை.
வணங்கான் படத்தின் கதையில், தான் செய்த மாற்றங்கள் சூர்யாவுக்கு திருப்தி அளிக்கவில்லை என்பதால், அவரை இந்த படத்தில் இருந்து விலகிக் கொள்ளுமாறு கூறியதாக அண்மையில் பாலா அறிக்கையொன்றை வெளியிட்டிருந்தார்.
இந்த நிலையில், வணங்கான் படத்தில் சூர்யா நடித்த வேடத்தில் அதர்வா நடிப்பதாக செய்திகள் வெளியாகி பிறகு அது பொய்யாகி போனது.
இந்தநிலையில், இப்போது அந்த வேடத்தில் அருண் விஜய் நடிக்கப் போவதாக இன்னொரு செய்தி வெளியாகியுள்ளது. எனினும், இதுகுறித்த அதிகாரபூர்வ செய்தி விரைவில் வெளியாகும் என எதிர்பார்க்கப்படுகின்றது.
