நயினை நாகபூசணி அம்மன் ஆலயத்தின் வருடாந்த மகோற்சவம் ஆரம்பம்

வரலாற்று சிறப்பு மிக நயினாதீவு நாகபூசணி அம்மன் ஆலயத்தின் வருடாந்த மகோற்சவம் இன்றையதினம் திங்கட்கிழமை கொடியேற்றத்துடன் ஆரம்பமானது.

இன்று காலை, ஆலய அறங்காவலர் சபை காரியாலயத்தில் இருந்து பூஜை வழிபாடுகளுடன் கொடிசீலை , நாக பாம்பு வாகனத்தில், ஆலயத்திற்கு எடுத்து வரப்பட்டது.  இதனையடுத்து அங்கு விசேட பூஜை வழிபாடுகள் இடம்பெற்ற நிலையில்  நண்பகல் கொடியேற்றம் இடம்பெற்றது.

இதனைத் தொடர்ந்து வரும் நாட்களில்  ஆலயத்தில் மகோற்சவ திருவிழாக்கள் இடம்பெறவுள்ளதோடு  எதிர்வரும் 1ஆம் திகதி இரவு சப்பர திருவிழாவும் , 02ஆம் திகதி காலை தேர்த்திருவிழாவும் , மறுநாள் 03ஆம் திகதி காலை தீர்த்த திருவிழாவும் இடம்பெறவுள்ளது.

மகோற்சவ காலத்தில் ஆலயத்துக்கு வருகை தரவுள்ள பக்தர்களுக்காகத்  தரை மற்றும் கடல் போக்குவரத்து வசதிகள் , தாக சாந்தி நிலையங்கள் , அன்னதானம் என அனைத்து ஏற்பாடுகளும் பூர்த்தி செய்யப்பட்டுள்ள நிலையில் பக்தர்களின் பாதுகாப்புக்காக ஆலய சூழலில் தற்காலிக பொலிஸ் நிலையம் அமைக்கப்பட்டு , சீருடை மற்றும் சிவில் உடையில் பெருமளவான பொலிஸார் கடமையில் ஈடுபட்டுள்ளனர் எனவும்  தெரிவிக்கப்பட்டுள்ளது.