இலங்கை மற்றும் இங்கிலாந்து அணிகள் இன்று பலப்பரீட்சை

2023 ஐசிசி ஒருநாள் உலகக் கிண்ண கிரிக்கெட் தொடரின் 25 வது போட்டியில் இலங்கை மற்றும் இங்கிலாந்து அணிகள் இன்று பலப்பரீட்சை நடத்தவுள்ளன.

சின்னசாமி மைதானத்தில் மதியம் 2 மணிக்கு ஆரம்பமாகும் இப்போட்டியில் இரு அணிகளிலும் மாற்றங்கள் இடம்பெறும் என தெரிவிக்கப்பட்டுள்ளது.

அதன்படி 15 பேர் கொண்ட இலங்கை அணியில் காயமடைந்த மதீஷ பத்திரனவுக்கு மாற்றாக ஏஞ்சலோ மேத்யூஸ், உத்தியோகபூர்வமாக உள்வாங்கப்பட்டுள்ளார்.

எனவே இன்றைய போட்டியில் சாமிக கருணாரத்னவுக்குப் பதிலாக ஏஞ்சலோ மேத்யூஸ் 11 பேர் கொண்ட அணியில் இடம்பிடிக்க வாய்ப்புள்ளது.

இதேவேளை துனித் வெல்லாலகே தகுதி பெறும் பட்சத்தில் துஷான் ஹேமந்தவிற்கு பதிலாக அவர் அணிக்குள் உள்வாங்கப்படுவார் என தெரிவிக்கப்பட்டுள்ளது.

இதுவரை பங்களாதேஷ் அணிக்கு எதிராக ஒரே ஒரு போட்டியில் மட்டுமே வெற்றி பெற்றுள்ள இங்கிலாந்து அணியில் வேகப்பந்து வீச்சாளர் காயமடைந்தமை அவ்வணிக்கு பின்னடைவாக உள்ளது.

அதன்படி ரீஸ் டொப்லி காயம் காரணமாக இன்றைய போட்டியில் விளையாட மாட்டார் என தெரிவிக்கப்படும் அதேநேரம் கிறிஸ் வோக்ஸ், சாம் கரன் மற்றும் லியம் லிவிங்ஸ்டன் ஆகியோர் அணியில் உள்வாங்கப்படுவார்கள் என தெரிவிக்கப்பட்டுள்ளது.