கிளிநொச்சி பொன்னகர் பகுதியில் நேற்றிரவு இடம்பெற்ற வாகன விபத்தில் ஒருவர் உயிரிழந்துள்ளார்.
யாழ்ப்பாணப் பல்கலைக்கழக கிளிநொச்சி வளாகம் அமைந்துள்ள பகுதிக்கு அருகில் மோட்டார் சைக்கிளொன்றை ரிப்பர் வாகனம் மோதியதிலேயே குறித்த விபத்து சம்பவித்துள்ளதாகத் தெரிவிக்கப்பட்டுள்ளது.
இந்நிலையில் விபத்தில் உயிரிழந்தவர் பொன்னகர் பகுதியை சேர்ந்த 34 வயதான சந்தானம் புஸ்பராசா எனத் தெரிய வந்துள்ளது.
அத்துடன் உயிரிழந்தவரின் சடலம் கிளிநொச்சி வைத்தியசாலையில் வைக்கப்பட்டுள்ள நிலையில், விசாரணைகளின் பின்னர் உறவினர்களிடம் கையளிக்கப்படவுள்ளதாகவும், இச் சம்பவம் தொடர்பில் கிளிநொச்சி பொலிசார் விசாரணை மேற்கொண்டு வருகின்றனர் எனவும் தெரிவிக்கப்பட்டுள்ளது.
இதேவேளை குறித்த வீதியானது கனரக வாகனங்கள் பயணிப்பதற்கு போதிய இடவசதி அற்ற நிலையில் காணப்படுகின்ற போதிலும் ஏராளமான ரிப்பர் வாகனங்கள் குறித்த வீதியை பயன்படுத்தி வருவதாகவும் பொதுமக்கள் விசனம் தெரிவித்துள்ளமை குறிப்பிடத்தக்கது.
