பாகிஸ்தானுக்கான நிதி உதவியை அதிகரிப்பது தொடர்பான பேச்சுவார்த்தையில் குறிப்பிடத்தக்க முன்னேற்றம் ஏற்பட்டுள்ளதாக சர்வதேச நாணய நிதியம் தெரிவித்துள்ளது.
சர்வதேச நாணய நிதியத்திடமிருந்து (IMF) பாகிஸ்தான் 3 பில்லியன் டொலர் நிதி உதவியை ஏற்கெனவே பெற்றுள்ள நிலையில் மேலதிகமாக, 6 பில்லியன் டொலர் முதல் 8 பில்லியன் டொலர் வரையில் நிதி உதவி கேட்டு பாகிஸ்தான் கோரிக்கை விடுத்திருந்தது.
இந்நிலையில், சர்வதேச நாணய நிதியம் மற்றும் பாகிஸ்தான் உயர்மட்ட அதிகாரிகளிடையே இடம்பெற்ற தொடர் பேச்சுவார்த்தைகளின் அடிப்படையில் பாகிஸ்தானுக்கு நிதி வழங்குவது தொடர்பில் சாதகமான நிலைப்பாடுகள் இருப்பதாக சர்வதேச நாணய நிதியம் தெரிவித்துள்ளது.
கடும் பொருளாதார நெருக்கடியை எதிர்கொண்டுள்ள பாகிஸ்தான், சர்வதேச நாணய நிதியம் மற்றும் நட்பு நாடுகளின் நிதி உதவி மூலம் தமது பொருளாதார நெருக்கடியைச் சமாளித்து வருகிறது.
இந்நிலையிலேயே நிதி உதவியை அதிகரிப்பது தொடர்பான பேச்சு வார்த்தையில் குறிப்பிடத்தக்க முன்னேற்றம் ஏற்பட்டுள்ளதாக சர்வதேச நாணய நிதியம் தெரிவித்துள்ளமை குறிப்பிடத்தக்கது.
