தான் ஜனநாயகத்திற்கு ஆபத்தானவன் என எதிர்க்கட்சியினர் தொடர்ந்து கூறி வருவது முட்டாள்தனமான கருத்து என அமெரிக்க முன்னாள் ஜனாதிபதி டொனால்ட் ட்ரம்ப் தெரிவித்துள்ளார்.
அமெரிக்காவின் மிச்சிகன் மாகாணத்தில் இன்று (21) நடைபெற்ற பிரசார பொதுக்கூட்டத்தில் பங்கேற்று உரையாற்றுகையில் இவ்வாறு தெரிவித்துள்ள அவர், ஜனநாயகத்திற்கு எதிராக நான் என்ன செய்தேன்? எனவும் கேள்வியெழுப்பியுள்ளார்.
அத்துடன், கடந்த வாரம் ஜனநாயகத்திற்காக தான் தோட்டாவை எதிர்கொண்டதாகவும் டொனால்ட் குறிப்பிட்டுள்ளார்.
அமெரிக்க ஜனாதிபதி தேர்தல் நவம்பர் 5 ஆம் திகதி நடைபெறவுள்ளது. இதில் ஜனநாயக கட்சி வேட்பாளராக தற்போதைய ஜனாதிபதி ஜோ பைடனும், குடியரசு கட்சி வேட்பாளராக முன்னாள் ஜனாதிபதி டொனால்ட் ட்ரம்பும் களமிறங்கியுள்ளனர்.
தேர்தல் நெருங்கி வரும் நிலையில், இரு வேட்பாளர்களும் தீவிர பிரசாரம் மற்றும் வாக்கு சேகரிப்பில் ஈடுபட்டு வருவதாக அமெரிக்க செய்திகள் தெரிவிக்கின்றன.
இந்நிலையில், கடந்த 14 ஆம் திகதி, குடியரசு கட்சி ஜனாதிபதி வேட்பாளர் டொனால்ட் ட்ரம்பின் பிரசார கூட்டம், பென்சில்வேனியா மாகாணம் பட்லர் நகரில் நடைபெற்றபோது, டொனால்ட் ட்ரம்ப் மீது துப்பாக்கிச்சூடு நடத்தப்பட்டது.
இந்த தாக்குதலில் ட்ரம்பின் காதில் இரத்த காயம் ஏற்பட்டதுடன், கூட்டத்தில் பங்கேற்றிருந்த நபரொருவர் உயிரிழந்துள்ளதுடன், மேலும் சிலர் படுகாயமடைந்தனர்.
துப்பாக்கிச் சூடு தாக்குதல் நடத்திய நபரை பாதுகாப்புப்படை அதிகாரிகள் சுட்டுக்கொன்றனர்.
பின்னர், காதில் காயம் ஏற்பட்ட அமெரிக்க முன்னாள் ஜனாதிபதி டொனால்ட் ட்ரம்ப் சிகிச்சைக்குப் பின்னர், மீண்டும் பிரசார கூட்டங்களில் பங்கேற்று வருகின்றமை குறிப்பிடத்தக்கது.
