கொழும்பு, வார்ட் பிளேஸ் பகுதியில் நிறுத்தி வைக்கப்பட்டிருந்த முச்சக்கரவண்டியில் இருந்து கூரிய ஆயுதங்களால் தாக்கப்பட்ட நிலையில் நபரொருவரின் சடலம் ஒன்றை பொலிஸார் கண்டு பிடித்தனர்.
இன்று (23) அதிகாலை 1 மணியளவில் பொலிஸாருக்குக் கிடைத்த தகவலின் படி தேசிய பல் வைத்தியசாலைக்கு அருகே நிறுத்தப்பட்டிருந்த முச்சக்கர வண்டியில் இருந்து குறித்த சடலம் மீட்கப்பட்டுள்ளது.
பொலிஸாரின் விசாரணையில், குறித்த முச்சக்கர வண்டி மித்தெனிய பிரதேசத்தில் வசிப்பவருக்கு சொந்தமானது எனவும், அவர் தனது மைத்துனருக்கு முச்சக்கரவண்டியை வாடகை அடிப்படையில் கொடுத்துள்ளார் எனவும் தெரிவிக்கப்பட்டுள்ளது.
அத்துடன் படுகொலை செய்யப்பட்டவர் கொடகவெல பிரதேசத்தைச் சேர்ந்த 33 வயதான சமிந்த குமார எனவும் அவர் பகலில் அலுமினியம் தொடர்பான வேலையில் ஈடுபடுவார் எனவும், இரவில் வாடகை முச்சக்கரவண்டி ஓட்டுநராக இருந்துள்ளார் எனவும் பொலிஸார் தெரிவித்தனர்.
இக் கொலைக்கான காரணம் இதுவரையில் தெரியவராத நிலையில் அவரது சடலம் பிரேத பரிசோதனைக்காக கொழும்பு தேசிய வைத்தியசாலைக்கு கொண்டு செல்லப்பட்டுள்ளதாகத் தெரிவிக்கப்பட்டுள்ளது.
இச் சம்பவம் தொடர்பில் கருவாத்தோட்டம் பொலிஸார் தீவிர விசாரணைகளை முன்னெடுத்து வருகின்றனர்.
