மாத்தறை , மிதிகம, அஹங்கம பகுதியில் துப்பாக்கிச் சூட்டை நடத்திய இரண்டு சந்தேகநபர்கள், போதைப் பொருட்களுடன் இன்று கைது செய்யப்பட்டுள்ளனர்.
மாத்தறை , மிதிகம, அஹங்கம பாலத்திற்கு அருகில் மீன் வியாபாரியொருவர் நேற்று காலை துப்பாக்கியால் சுடப்பட்டு, கொல்லப்பட்டார்.
மோட்டார் சைக்கிளில் குறித்த பகுதிக்கு வருகைத் திருந்திருந்த இரண்டு சந்தேகநபர்கள் இந்தத் துப்பாக்கிச் சூட்டை நடத்திவிட்டு தப்பிச் சென்றிருந்த நிலையில், பொலிஸார் இவர்களைத் தேடும் பணிகளையும் முடக்கி விட்டிருந்தனர்.
இந்த நிலையில், குறித்த இரண்டு சந்தேக நபர்களையும் ஹெரோயினுடன் மிதிகம, அஹங்கம பிரதேசத்தில் கைது செய்துள்ளதாக பொலிஸ் விசேட அதிரடிப்படை தெரிவித்துள்ளது.
அக்லுகஹா மற்றும் கோட்டை பிரதேசங்களில் வசிக்கும் 30 மற்றும் 38 வயதுடைய இருவரே இவ்வாறு கைதுசெய்யப்பட்டுள்ளனர்.
சந்தேகநபர்களிடம் இருந்து 11 கிராம் 500 மில்லிகிராம் ஹெரோயின் போதைப் பொருளை பொலிஸார் இதன்போது கைப்பற்றியுள்ளனர்.
சந்தேகநபர்கள் இருவரும் டி- 56 துப்பாக்கி மற்றும் கைத்துப்பாக்கியை பயன்படுத்தி மீன் வியாபாரி மீது துப்பாக்கிச் சூடு நடத்தியுள்ளதாக பொலிஸ் விசாரணையில் தெரியவந்துள்ளது.
