வருடத்தில் 24 ஏகாதசிகள் வந்தாலும் ஒரு சில மாதங்களில் வரும் ஏகாதசிகள் மிகவும் சிறப்பு வாய்ந்தவையாகும்.
அப்படிப்பட்ட மிகவும் முக்கியமான, சிறப்பு வாய்ந்த ஏகாதசி தான் நவம்பர் 12 ஆம் திகதியான இன்று வரும் தேவ உதனி ஏகாதசி ஆகும்.
இதை பிரபோதினி ஏகாதசி என்றும் சொல்லுவது உண்டு.
ஐப்பசி மாத வளர்பிறையில் வரும் இந்த ஏகாதசி நாளில் தான் மகாவிஷ்ணு, தன்னுடைய நான்கு மாத உறக்கத்திற்கு பிறகு கண் விழிக்கும் நாளாக கருதப்படுகிறது.
அதனால் இது வாழ்க்கையையே மாற்றி, புதிய வெளிச்சத்தையும், மகிழ்ச்சியையும், செல்வ நலன்களையும் அள்ளித்தரும் அற்பது விரத நாளாக கருதப்படுகிறது.
தேவ என்றால் இறைவன் அல்லது மகாவிஷ்ணு, உதனி என்றால் கண் விழிப்பது, ஏகாதசி என்றால் 11 ஆவது நாள். மகாவிஷ்ணு கண்விழிக்கும் 11 ஆவது நாள் என்பதை குறிப்பதே தேவ உதனி ஏகாதசி ஆகும்.
காக்கும் கடவுளான மகாவிஷ்ணு கண் விழித்து எழும் நாள் என்பதால் ஐப்பசி மாத ஏகாதசிக்கு பிறகு வரும் நாட்களில் திருமணம் போன்ற மங்கல காரியங்கள் அதிக அளவில் நடத்துவார்கள்.
இந்த ஏகாதசி நாளில் வாழ்க்கை அமைதி, செல்வ வளம், மகிழ்ச்சி நிறைந்ததாக இருக்க வேண்டும் என பக்தர்கள் பெருமாளிடம் வழிபடுவதுண்டு.
தேவ உதனி ஏகாதசிக்கு விரதத்திற்கு மற்றொரு சிறப்பும் உண்டு.
இந்த நாளில் விரதம் இருந்து பெருமாளை மனதார பிரார்த்தை செய்தால் பாதுகாப்பு, வெற்றிகள், விருப்பங்கள் அனைத்தும் நிறைவேறுவதற்கான புதிய வாய்ப்புகள், வழிகள் துவங்கும்.
இது செல்வ வளத்தையும், நிறைவான வாழ்க்கையையும் தரக் கூடிய ஏகாதசியாகும்.
இந்த நாளில் எவர் ஒருவர் விரதம் இருந்து வழிபடுகிறார்களோ அவர் செய்த கடுமையான பாவங்களும் மன்னிக்கப்பட்டு, அவரது வாழ்க்கை சிறப்பதுடன், அவரது முன்னோர்களும் நரகத்தில் இருந்து விடுவிக்கப்பட்டு மோட்சம் அடைவதற்காக வைகுண்டத்திற்கு அழைத்துச் செல்லப்படுவார்கள்.
தேவ உதனி ஏகாதசி அன்று அதிகாலையில் எழுந்து புனித நீராடினால் உடல், மனம், ஆத்மா ஆகியன சுத்தமடையும்.
உணவு, நீர் ஆகியவற்றை தவிர்த்து கடுமையாக விரதம் இருந்து வழிபட்டு, மாலையில் பெருமாள் கோவிலுக்கு சென்று வழிபட வேண்டும்.
அன்றைய தினம் பெருமாள் தூக்கத்தில் இருந்து எழுவதால் அவருக்கு விளக்கேற்றி, பழங்கள், இனிப்புகள், காய்கறிகள் படைத்தும், இனிமையான பாடல்கள் பாடியும் வழிபட வேண்டும்.
இந்த நாளில் நல்லெண்ணெய்யில் தீபம் ஏற்றி வழிபடுவது மிக மிக சிறப்பானதாகும்.
