தென் மாநிலமான கேரள கடற்கரைக்கு அருகே அரபிக் கடலில் சிங்கப்பூர் கொடியுடன் கூடிய சரக்குக் கப்பலில் ஏற்பட்ட தீயை அணைக்க இந்திய கடலோர காவல்படை தொடர்ந்து இரண்டாவது நாளாகவும் போராடி வருகிறது.
இலங்கையின் கொழும்பிலிருந்து இந்தியாவின் மும்பை நகரத்திற்குச் சென்று கொண்டிருந்த MV Wan Hai 503 என்ற சரக்குக் கப்பலின் கொள்கலன் திங்கட்கிழமை (09) வெடித்தது.
இதன் விளைவாக கப்பலில் பெரும் தீ விபத்து ஏற்பட்டது.
இதுவரை கப்பலில் பயணித்த 18 பணியாளர்கள் மீட்கப்பட்டுள்ளனர்.
நான்கு பேர் காணாமல் போயுள்ளனர்.
மீட்புப் பணிகளுக்கு உதவ சிங்கப்பூர் ஒரு குழுவை அனுப்பியுள்ளது.
கப்பலில் இருந்து எண்ணெய் கசிவு மற்றும் குப்பைகள் வெளியேற வாய்ப்புள்ளதாக இந்திய தேசிய பெருங்கடல் தகவல் சேவைகள் மையம் (INCOIS) கேரள கடற்கரைக்கு எச்சரிக்கை விடுத்துள்ளது.
செவ்வாய்க்கிழமை வெளியான காட்சிகளில், இந்திய கடற்படை மற்றும் கடலோர காவல்படையினர் தீயை அணைக்க முயன்றபோது, MV Wan Hai 503 கப்பல் பெரிய புகையை வெளியிடுவதைக் காட்டியது.
மேலும் அதிகமான கொள்கலன்கள் கடலில் விழுந்துள்ளதாக கூறப்படுகிறது.
திங்கட்கிழமை மேற்கொள்ளப்பட்ட தேடுதல் மற்றும் மீட்பு நடவடிக்கையில், கப்பலின் 22 பணியாளர்களில் 18 பேர் மீட்கப்பட்டு கரைக்கு கொண்டு வரப்பட்டனர்.
அவர்களில் சிலர் காயங்களுக்கு சிகிச்சை பெற்று வருகின்றனர்.
தீ விபத்து ஏற்பட்டபோது கப்பலில் இருந்த பணியாளர்கள் கப்பலை கைவிட்டு ஒரு படகில் ஏறி தப்பியுள்ளனர்.
பின்னர் கடற்படை அவர்களை மீட்டது என்று இந்திய பாதுகாப்பு அமைச்சகம் தெரிவித்துள்ளது.
கேரள கடற்கரைக்கு அருகில் மூன்று வாரங்களில் நடந்த இரண்டாவது சம்பவம் இதுவாகும்.
கடந்த மாதம், எண்ணெய் மற்றும் ஆபத்தான சரக்குகளை ஏற்றிச் சென்ற லைபீரியக் கொடியுடன் கூடிய கப்பல் கசிந்து அரபிக் கடலில் மூழ்கியது.
இதனால் குடியிருப்பாளர்கள் மற்றும் கடல்வாழ் உயிரினங்களின் ஆரோக்கியத்திற்கு தீங்கு விளைவிக்கும் என்ற அச்சம் எழுந்தது.
கேரளத்தின் கடலோரப் பகுதி பல்லுயிர் பெருக்கத்தால் நிறைந்துள்ளது, மேலும் மாநிலம் ஒரு முக்கியமான சுற்றுலாத் தலமாகும்.
