கொரியப் பொருளாதாரத்திற்கு இலங்கைத் தொழிலாளர்கள் ஆற்றிய குறிப்பிடத்தக்க பங்களிப்பினை கொரியக் தென்கொரிய தேசிய சட்டமன்றத்தின் பிரதி சபாநாயகர் லீ ஹக்-யங் பாராட்டியுள்ளார்.
மேலும் அவர்களின் சேவைக்காக இலங்கைக்கு தனது நன்றியைத் தெரிவித்துள்ளார்.
கைத்தொழில் மற்றும் தொழில்முனைவோர் மேம்பாட்டு அமைச்சர் சுனில் ஹந்துன்நெத்தியுடனான சந்திப்பின் போது அவர் இந்தக் கருத்துக்களைத் தெரிவித்தார்.
இந்தக் கலந்துரையாடலின் போது, கொரிய தொழிலாளர் சந்தையில் இலங்கை தொழிலாளர்களுக்கு வேலை வாய்ப்புகளை வழங்குவதற்காக கொரிய அரசாங்கத்திற்கு அமைச்சர் ஹந்துன்நெத்தி தனது பாராட்டுகளைத் தெரிவித்தார்.
இலங்கையில் மிகவும் திறமையான மற்றும் நன்கு பயிற்சி பெற்ற பணியாளர்கள் உள்ளனர் என்பதையும் அவர் எடுத்துரைத்தார்.
கொரிய முதலீட்டாளர்கள் இலங்கையில் முதலீடு செய்வதற்கான சாத்தியக்கூறுகள், உள்ளூர் பணியாளர்களிடமிருந்து பயனடைதல் மற்றும் இலங்கையில் உற்பத்தி செய்யப்படும் பொருட்களைக் கொண்டு இந்தியா, பாகிஸ்தான் மற்றும் பங்களாதேஷ் போன்ற பிராந்திய சந்தைகளை அணுகுதல் ஆகியவற்றை இந்தக் கூட்டம் மேலும் வலியுறுத்தியது.
இலங்கையின் தற்போதைய சர்வதேச நாணய நிதியத்துடனான (IMF) ஈடுபாட்டைப் போலவே, தென் கொரியாவும் கடந்த காலங்களில் சவாலான பொருளாதார காலகட்டங்களை எதிர்கொண்டதாகக் குறிப்பிட்ட பிரதி சபாநாயகர் லீ ஹக்-யங், இலங்கை அதன் தற்போதைய சவால்களை சமாளித்து வளர்ந்த பொருளாதாரமாக மாறுவதை நோக்கி முன்னேறும் என்று நம்பிக்கை தெரிவித்தார்.
இரு நாடுகளையும் பாதிக்கும் விசா தொடர்பான பிரச்சினைகளைத் தீர்ப்பது, இலங்கைக்கும் கொரிய குடியரசுக்கும் இடையிலான நீண்டகால 50 ஆண்டுகால நட்பை வலுப்படுத்துவது மற்றும் இருதரப்பு ஒத்துழைப்பை மேலும் விரிவுபடுத்துவது குறித்தும் கொரிய தூதுக்குழுவும் அமைச்சர் ஹந்துன்நெத்தியும் விவாதித்தனர்.
