இலங்கையுடனான மூன்று நாட்கள் இராஜதந்திர பேச்சுவார்த்தைகளுக்குப் பின்னர், 2026 டி20 கிரிக்கெட் உலகக் கிண்ணம் தொடர்பான பாகிஸ்தானின் முடிவு மாற்றப்பட்டதாக இலங்கைக்கான பாகிஸ்தான் உயர் ஸ்தானிகர் ஓய்வுபெற்ற மேஜர் ஜெனரல் ஃபஹீம் உல் அஜீஸ் (Faheem Ul Aziz) இலங்கை வெளிவிவகார அமைச்சர் விஜித ஹேரத்திடம் தெரிவித்தார்.
இந்தியாவுக்கு எதிரான 2026 டி20 உலகக் கிண்ணப் போட்டியில் பங்கேற்க வேண்டாம் என்று பாகிஸ்தான் முன்னர் முடிவு செய்திருந்தது.
ஆனால் இலங்கையின் வேண்டுகோளின் பேரில், இப்போது வேறுபாடுகளை ஒதுக்கி வைத்துவிட்டு போட்டியில் பங்கேற்க ஒப்புக்கொண்டுள்ளதாகவும், பிரச்சினையைத் தீர்ப்பதில் இலங்கையின் மத்தியஸ்தத்தை மேலும் பாராட்டுவதாகவும் அவர் கூறினார்.
இலங்கையில் தனது பதவிக்காலத்தை முடிப்பதற்கு முன்னதாக, உயர் ஸ்தானிகர் ஃபஹீம் உல் அஜீஸ் இன்று (10) வெளியுறவு அமைச்சில் அமைச்சர் விஜித ஹேரத்தை சந்தித்தபோது இந்தக் கருத்துக்களை தெரிவித்தார்.
மூன்று நாட்கள் நடைபெற்ற இராஜதந்திர பேச்சுவார்த்தைகள் மற்றும் தொலைபேசி கலந்துரையாடல்களின் போது உயர் ஸ்தானிகரின் உடனடி பதிலுக்கு அமைச்சர் விஜித ஹேரத் நன்றி தெரிவித்தார்.
டி20 உலகக் கிண்ணத்தை சுற்றியுள்ள பல நிச்சயமற்ற தன்மைகளைத் தீர்க்க அமைச்சர் விஜித்த ஹேரத்தின் தொடர்ச்சியான இராஜதந்திர முயற்சிகளையும் ஃபஹீம் உல் அஜீஸ் பாராட்டினார்.
தனது பதவிக் காலத்தைப் பற்றி நினைவுகூர்ந்த உயர் ஸ்தானிகர், இலங்கையில் பணியாற்றுவது ஒரு இனிமையான மற்றும் வெற்றிகரமான காலகட்டமாக இருந்ததாகவும், இலங்கை வெளிவிவகார அமைச்சர் மற்றும் அமைச்சகத்தின் வலுவான ஆதரவு இதற்குக் கிடைத்ததாகவும் கூறினார்.
தனது சேவைக் காலத்தில், 2024 ஆம் ஆண்டில் இலங்கை இரண்டு நியாயமான மற்றும் முன்மாதிரியான தேர்தல்களை நடத்தியது குறித்து அவர் திருப்தியடைந்ததாகவும் குறிப்பிட்டார்.
