எண்ணெய் சந்தையில் நிலவி வரும் நிலையற்ற தன்மை காரணமாக, கனடாவில் டீசல் விலை விரைவில் புதிய வரலாற்று உச்சத்தை எட்டக்கூடும் என எதிர்பார்க்கப்படுகிறது.
ஈரான் நாட்டின் தற்போதைய சூழல் மற்றும் ஹோர்முஸ் நீரிணை வழியாக தினசரி 20 மில்லியன் பேரல் எண்ணெய் கொண்டு செல்லும் கப்பல்களின் போக்குவரத்து தடைபடும் அபாயம் ஆகியவை சர்வதேச சந்தையில் கச்சா எண்ணெய் விலையை உயர்த்தி வருகின்றன.
பதற்றத்தைக் குறைப்பதற்கான அறிகுறிகள் தென்படாததால் சந்தை பெரும் அழுத்தத்தில் இருப்பதாக பெட்ரோலிய ஆய்வு நிறுவனமான ‘கேஸ்படி’ (GasBuddy) அமைப்பின் தலைவர் பேட்ரிக் டி ஹான் தெரிவித்தார்.
இன்றைய (03-04-2026) நிலவரப்படி, டொராண்டோ உள்ளிட்ட பெரும்பாக பகுதிகளில் ஒரு லிட்டர் பெட்ரோல் விலை 1.84 டொலராகவும், டீசல் விலை 2.20 டொலராகவும் பதிவாகியுள்ளது.
பெட்ரோல் விலை தற்போது அதன் முந்தைய உச்சத்தை விட 40 சதங்கள் குறைவாகவே உள்ளது. இருப்பினும், வரும் வாரங்களில் நீரிணை விவகாரத்தில் தீர்வு காணப்படாவிட்டால், பெட்ரோல் விலையும் அதன் அதிகபட்ச அளவை நெருங்கக்கூடும் என்று ஆய்வாளர்கள் எச்சரிக்கின்றனர்.
கடந்த இருபது ஆண்டுகளுக்கும் மேலாக எண்ணெய் விலைகளைக் கண்காணித்து வரும் நிலையில், இந்த ஆண்டுதான் எண்ணெய் சந்தை மிகக் கடுமையான ஏற்ற இறக்கங்களைச் சந்தித்து வருவதாக பேட்ரிக் டி ஹான் சுட்டிக்காட்டினார்.
சர்வதேச அரசியல் மோதல்கள் மற்றும் போக்குவரத்துப் பாதைகளில் நிலவும் அச்சுறுத்தல்கள், பொதுமக்களின் எரிபொருள் செலவினங்களில் நேரடித் தாக்கத்தை ஏற்படுத்தத் தொடங்கியுள்ளன.
