பிரித்தானியாவின் புகழ்பெற்ற ஆறுகளை மாசுபடுத்தியதாகக் கூறப்படும் குற்றச்சாட்டு தொடர்பாக, நாட்டின் மிகப்பெரிய கோழி இறைச்சி உற்பத்தி நிறுவனம் மற்றும் நீர் நிறுவனம் ஒன்றிற்கு எதிராக லண்டன் மேல்நீதிமன்றத்தில் இன்று வரலாற்று முக்கியத்துவம் வாய்ந்த வழக்கு விசாரணை ஆரம்பமாகிறது.
வை (Wye), லக் (Lugg) மற்றும் அஸ்க் (Usk) ஆறுகள் கோழிப்பண்ணை கழிவுகள் மற்றும் கழிவுநீர் வெளியேற்றத்தால் மாசடைந்துள்ளதைக் கண்டித்து, 4,500-க்கும் மேற்பட்ட உள்ளூர் மக்கள் ஒன்றிணைந்து இந்த நஷ்டஈடு வழக்கைத் தொடர்ந்துள்ளனர்.
குறிப்பாக, இப்பகுதியில் வளர்க்கப்படும் 24 மில்லியன் கோழிகளின் கழிவுகள் ஆற்றில் கலப்பதால் ஏற்படும் ‘பாசிப் படலங்கள்’ (Algal blooming), ஆற்று நீரை பச்சை நிறமாகவும் நாற்றமடித்ததாகவும் மாற்றியுள்ளதாக மனுதாரர்கள் குற்றம் சுமத்துகின்றனர்.
தமது நிறுவனங்கள் மீதான குற்றச்சாட்டுகளை சம்பந்தப்பட்ட நிறுவனங்கள் மறுத்துள்ள போதிலும், சுற்றுச்சூழல் பாதிப்புகளுக்குக் காரணமானவர்களே அதற்கான இழப்பீட்டை வழங்க வேண்டும் என்பதில் இயற்கை ஆர்வலர்கள் உறுதியாக உள்ளனர்.
