தனது ருத்ர தாண்டவத்தால் பல சாதனைகளை முறியடித்த வைபவ் சூர்யவன்ஷி! 

நியூ சண்டிகாரில் நேற்றிரவு நடந்த 2026 இந்தியன் பிரீமியர் லீக் எலிமினேட்டர் போட்டியில், வைபவ் சூர்யவன்ஷி தனது பிரமிக்க வைக்கும் 29 பந்துகளில் 97 ஓட்டங்கள் குவித்து சன்ரைசர்ஸ் ஹைதராபாத் அணியை 47 ஓட்டங்கள் வித்தியாசத்தில் வீழ்த்த ராஜஸ்தான் ரோயல்ஸ் அணிக்கு உதவினார்.

இதன் மூலம் போட்டியின் ஆட்ட நாயகனாகத் தேர்ந்தெடுக்கப்பட்ட 15 வயதான வைபவ் சூர்யவன்ஷி, இந்த சீசனில் ராஜஸ்தான் ரோயல்ஸ் அணிக்காக 15 போட்டிகளில் 680 ஓட்டங்கள் குவித்து, நடப்பு ஐ.பி.எல். சீசனனில் அதிக ஓட்டங்களை குவித்த வீரருக்கான ஆரஞ்சு தொப்பியை தனதாக்கினார்.

வைபவ் சூர்யவன்ஷியின் ஆக்ரோஷமான ஆட்டத்தின் ஒரு கட்டத்தில் இடது கை ஆட்டக்காரரான அவர், கிறிஸ் கெய்லின் 30 பந்துகளில் அதிவேக ஐ.பி.எல். சதம் என்ற சாதனையை முறியடித்துவிடுவார் என்று தோன்றியது.

எனினும், அந்த இளம் வீரர் 29 பந்துகளில் 97 ஓட்டங்கள் எடுத்திருந்த நிலையில், பிரஃபுல் கீல்லின் பந்து வீச்சில் பிடிகொடுத்து ஆட்டமிழந்து அந்த சாதனையை நூலிழையில் தவறவிட்டார்.

இருந்தாலும், அதற்கு முன்பாகவே அவர் பல சாதனைகளை இந்த இன்னிங்ஸில் முறியடித்தார்.

அதன்படி இந்தப் போட்டியில் வைபவ் சூர்யவன்ஷி முறியடித்த சாதனைகள் இதோ:

ஒரு ஐ.பி.எல். சீசனில் அன்-கேப்ட் பிளேயர் எடுத்த அதிகபட்ச ஓட்டம்

2023 ஐ.பி.எல். போட்டியில் 626 ஓட்டங்கள் எடுத்திருந்த சக ராஜஸ்தான் ரோயல்ஸ் துடுப்பாட்ட வீரர் யஷஸ்வி ஜெய்ஸ்வாலின் முந்தைய சாதனையை முறியடித்து, ஒரு ஐபிஎல் சீசனில் அன்-கேப்ட் பிளேயர் (சர்வதேச அனுபவமற்ற வீரர்) எடுத்த அதிக ஓட்டங்கள் என்ற சாதனையை சூர்யவன்ஷி படைத்தார். 

அவர் இப்போது இந்த சீசனில் 680 ஓட்டங்களை எடுத்துள்ளார்.

ஒரு ஐ.பி.எல். சீசனில் அதிக சிக்ஸர்கள்

2026 ஐபிஎல் போட்டியில்  வைபவ் சூர்யவன்ஷி அடித்த 65 சிக்ஸர்கள், எந்தவொரு டி20 போட்டியிலும் ஒரு துடுப்பாட்ட வீரர் அடித்த அதிகபட்ச சிக்ஸர்களின் எண்ணிக்கையாகும். 

2012 ஐபிஎல் போட்டியில் 59 சிக்ஸர்கள் அடித்து கிறிஸ் கெய்ல் படைத்த சாதனையை அவர் முறியடித்தார். 

அந்த சாதனையை படைக்க கெய்ல் 456 பந்துகளை எதிர்கொண்டார்.

ஆனால் சூர்யவன்ஷி வெறும் 266 பந்துகளை மட்டுமே எதிர்கொண்டார்.

டி20 தொடரில் 600 ஓட்டங்கள் எடுத்த முதல் இளம் வீரர்

15 வயதான அவர், எந்தவொரு டி20 தொடரிலும் 600 ஓட்டங்கள் எடுத்த முதல் வீரர் என்ற பெருமையைப் பெற்றார். 

இந்த மைல்கல்லை எட்ட நேற்றைய போட்டியில் அவருக்கு 17 ஓட்டங்கள் தேவைப்பட்டன, மேலும் மூன்றாவது ஓவரின் இரண்டாவது பந்தில் அவர் இந்த சாதனையை எட்டினார்.

ஐ.பி.எல். பிளேஆஃப் போட்டிகளில் அதிவேகமான 50 ஓட்டம்

அபார திறமை வாய்ந்த அந்த இளம் வீரர் 16 பந்துகளில் அரைசதம் அடித்து, ஐபிஎல் பிளேஆஃப் வரலாற்றில் அதிவேக அரைசதம் அடித்த சுரேஷ் ரய்னாவின் சாதனையை சமன் செய்தார். 

ரய்னா, 2014 ஐபிஎல் தொடரின் குவாலிஃபையர் 2 போட்டியில் சென்னை சூப்பர் கிங்ஸ் அணிக்காக பஞ்சாப் கிங்ஸ் அணிக்கு எதிராக 16 பந்துகளில் தனது அரைசதத்தை எட்டியிருந்தார்.

ஐ.பி.எல். பிளேஆஃப் இன்னிங்ஸில் அதிக சிக்ஸர்கள்

அதிரடியாக விளையாடும் அந்த இடது கை ஆட்டக்காரரின் 97 ஓட்டங்களில் 12 சிக்ஸர்கள் அடங்கும். 

இது, ஐபிஎல் பிளேஆஃப் இன்னிங்ஸில் ஒரு வீரர் அடித்த அதிகபட்ச சிக்ஸர்களுக்கான புதிய சாதனையாகும். 

2023 ஐ.பி.எல் குவாலிஃபையர் 2 போட்டியில் குஜராத் டைட்டன்ஸ் அணிக்காக மும்பை இந்தியன்ஸுக்கு எதிராக ஷுப்மன் கில் 10 சிக்ஸர்களை அடித்தது இதற்கு முந்தைய சாதனையைாக அமைந்திருந்தது.

ஒரு ஐ.பி.எல். சீசனில் மூன்று முறை ஒரு இன்னிங்ஸில் 10க்கும் மேற்பட்ட சிக்ஸர்களை அடித்த முதல் வீரர்

சூர்யவன்ஷியின் நேற்றைய 12 சிக்ஸர்கள், ஒரே ஐ.பி.எல் சீசனில் ஒரு இன்னிங்ஸில் மூன்று முறை 10க்கும் மேற்பட்ட சிக்ஸர்களை அடித்த முதல் வீரர் என்ற பெருமையையும் அவருக்குப் பெற்றுத் தந்தது. 

இந்த சீசனின் தொடக்கத்தில், அவர் ஜெய்ப்பூரில் சன்ரைசர்ஸ் ஹைதராபாத் அணிக்கு எதிராக 12 சிக்ஸர்களையும், அதே மைதானத்தில் லக்னோ சூப்பர் ஜெயண்ட்ஸ் அணிக்கு எதிராக 10 சிக்ஸர்களையும் அடித்திருந்தார்.

சமன் செய்யப்பட்ட கிறிஸ் கெய்லின் சாதனை 

அதிரடி இடது கை ஆட்டக்காரரான இவர், தற்போது ஐ.பி.எல். போட்டிகளில் நான்கு இன்னிங்ஸ்களில் 10-க்கும் மேற்பட்ட சிக்ஸர்களை அடித்த கிறிஸ் கெய்லின் சாதனையை சமன் செய்துள்ளார்.

சூர்யவன்ஷி ஒரு இன்னிங்ஸில் 10-க்கும் மேற்பட்ட சிக்ஸர்களை விளாசிய முதல் நிகழ்வு, கடந்த முறை குஜராத் அணிக்கு எதிராக தனது முதல் ஐ.பி.எல். சதத்தை அடித்தபோது நிகழ்ந்தது; அப்போது அவர் 11 சிக்ஸர்களை அடித்தார்.

ஒரே ஐ.பி.எல். சீசனில் அதிக பவர்பிளே ஓட்டங்கள்

பவர்பிளேயில் ஆரம்பத்தில் உள்ள களத்தடுப்பு கட்டுப்பாடுகளைச் சாதகமாகப் பயன்படுத்திக் கொள்வதில் பெயர் பெற்ற சூர்யவன்ஷி, தற்போது முதல் ஆறு ஓவர்களில் 490 ஓட்டங்கள் குவித்து, ஒரே ஐபிஎல் சீசனில் பவர்பிளேயில் அதிக ஓட்டங்கள் எடுத்த சாதனையைத் தனதாக்கியுள்ளார்.

இதற்கு முன்பு, 2016 ஐபிஎல் தொடரில் சன்ரைசர்ஸ் ஹைதராபாத் அணிக்காக 467 ஓட்டங்கள் எடுத்திருந்த டேவிட் வார்னர் இந்தச் சாதனையை வைத்திருந்தார்.

ஐ.பி.எல். பவர்பிளே ஓவர்களில் அதிக சிக்ஸர்கள்

புதன்கிழமை சன்ரைசர்ஸ் ஹைதராபாத் அணிக்கு எதிரான போட்டியின் முதல் ஆறு ஓவர்களில் சூர்யவன்ஷி அடித்த எட்டு சிக்ஸர்கள், ஐபிஎல் பவர்பிளே ஓவர்களில் ஒரு வீரர் அடித்த அதிகபட்ச சிக்ஸர்களாகும். 

இதற்கு முன்னர் அபிஷேக் சர்மா, சனத் ஜெயசூர்யா மற்றும் ஜோனி பெயர்ஸ்டோ உள்ளிட்ட பல வீரர்கள் பவர்பிளேயில் ஏழு சிக்ஸர்களை அடித்திருந்தனர்.