எரிபொருள் நெருக்கடியின் போது பொதுச் செலவுகளைக் கட்டுப்படுத்தும் நடவடிக்கைகளின் ஒரு பகுதியாக, அமைச்சர்கள், நாடாளுமன்ற உறுப்பினர்கள் மற்றும் பிற பொது அதிகாரிகளுக்கு முன்பு விதிக்கப்பட்டிருந்த எரிபொருள் பயன்பாட்டுக் கட்டுப்பாடுகளை அரசாங்கம் நீக்கியுள்ளது.
நிதி அமைச்சின் செயலாளர் இது தொடர்பான அறிவிப்பை அனைத்து அமைச்சுக்களின் செயலாளர்கள், மாகாண பிரதம செயலாளர்கள், ஆணையங்கள், அரச திணைக்களங்கள், மாவட்டச் செயலகங்கள், அரச கூட்டுத்தாபனங்கள் மற்றும் சட்டரீதியான சபைகளின் தலைவர்களுக்குச் சுற்றறிக்கை மூலம் இந்த தகவலை வழங்கியுள்ளார்.
மத்திய கிழக்கில் ஏற்பட்ட மோதலைத் தொடர்ந்து இந்தக் கட்டுப்பாடுகள் அறிமுகப்படுத்தப்பட்டன.
செலவு மேலாண்மை நடவடிக்கையாக, அமைச்சர்கள், பிரதி அமைச்சர்கள், நாடாளுமன்ற உறுப்பினர்கள் மற்றும் பொது அதிகாரிகளுக்கான எரிபொருள் படிகளை மார்ச் 1-ஆம் திகதி நிலவிய எரிபொருள் விலையின் அடிப்படையில் கணக்கிடுமாறு ஏப்ரல் 2-ஆம் திகதி அரசாங்கம் ஒரு சுற்றறிக்கையை வெளியிட்டிருந்தது.
எனினும், புதிய சுற்றறிக்கை முந்தைய உத்தரவை இரத்து செய்கிறது.
அதன்படி, ஜூலை 1-ஆம் திகதி முதல், அமைச்சர்கள், நாடாளுமன்ற உறுப்பினர்கள் மற்றும் பிற பொது அதிகாரிகளுக்குச் சந்தையில் நிலவும் எரிபொருள் விலையின் அடிப்படையில் எரிபொருள் வழங்கப்படும்.
