செவ்வாய்க்கிழமை நடைபெற்ற ஃபிஃபா உலகக் கிண்ணத் தொடரின் 16-வது சுற்றுப் போட்டியில், ஆர்ஜென்டினாவிடம் தனது அணி 3-2 என்ற கணக்கில் பரபரப்பான முறையில் தோல்வியடைந்தபோது, இனவெறிக்கு எதிரான ஃபிஃபாவின் சைகையைச் செய்ததற்காக எகிப்து அணியின் பயிற்சியாளர் ஹோசம் ஹசனுக்கு (Hossam Hassan ) மஞ்சள் அட்டை காட்டப்பட்டது.
அட்லாண்டா மைதானத்தில் நடந்த குழப்பமான இறுதிக்கட்டத்தில் ஹசனின் செயல்கள் நிகழ்ந்தன.
அங்கு, எகிப்து 2-0 என்ற முன்னிலையை இழந்த நிலையில், லியோனல் மெஸ்ஸியின் உத்வேகத்தால் ஆர்ஜென்டினா அணி கடுமையாகப் போராடி காலிறுதிக்கு முன்னேறி, உலகக் கிண்ணப் பட்டத்தைத் தக்கவைக்கும் தங்களது முயற்சியை உயிர்ப்புடன் வைத்திருந்தது.
உணர்ச்சிகள் கொந்தளித்த இந்த ஆட்டத்தில் எகிப்து அணியின் பல வீரர்கள் மற்றும் பயிற்சியாளர் குழு உறுப்பினர்களுக்கு பிரெஞ்சு நடுவர் பிரான்சுவா லெடெக்ஸியர் எச்சரிக்கை (அட்டை) வழங்கினார்.
எகிப்து அணியின் இரண்டாவது கோலாக அமைந்திருக்கக்கூடிய ஒரு கோல், சர்ச்சைக்குரிய VAR முடிவின் மூலம் இரத்து செய்யப்பட்டதைத் தொடர்ந்து ஏற்பட்ட மோதலின் விளைவாக, ஆட்டத்தின் இரண்டாம் பாதியின் கூடுதல் நேரத்தில் எகிப்து அணியின் மாற்று வீரர் ஒருவர் மைதானத்தை விட்டு வெளியேற்றப்பட்டார்.
போராட்டங்களுக்கு மத்தியில் ஹசன், நடுவர் லெடெக்ஸியருக்கு (Letexier) முன்னால் நின்று, தனது கைகளை ‘X’ வடிவில் குறுக்காக வைத்து சைகை காண்பித்தார்.
இனவெறிக்கு எதிரான உலகளாவிய நடைமுறையின் ஒரு பகுதியாக ஃபிஃபா அறிமுகப்படுத்திய சைகை இதுவாகும்.
ஃபிஃபாவின் வழிகாட்டுதல்களின்படி, போட்டியின் போது இனவெறி ரீதியான அவதூறு நிகழ்வதாகக் கருதப்பட்டால், நடுவரின் கவனத்தை ஈர்க்க வீரர்கள், பயிற்சியாளர்கள் அல்லது அணி அதிகாரிகள் இந்தச் சைகையைப் பயன்படுத்தலாம்.
இது உறுதிப்படுத்தப்பட்டால், நடுவர் ஃபிஃபாவின் (FIFA) மூன்று-படிநிலை நடைமுறையைச் செயல்படுத்தலாம்.
இது ஆட்டத்தை தற்காலிகமாக நிறுத்துவதன் மூலம் தொடங்குகிறது. அத்துமீறல் தொடர்ந்தால், ஆட்டம் இடைநிறுத்தப்படலாம்; மிக மோசமான சூழல்களில், ஆட்டம் முழுமையாகக் கைவிடப்படலாம்.
எனினும், அதற்குப் பதிலாக, லெடெக்ஸியர் ஹசனுக்கு மஞ்சள் அட்டை காட்டினார், ஆட்டம் தொடர்ந்தது.
எகிப்து அணியின் பயிற்சியாளருக்கு ஏன் எச்சரிக்கை விடுக்கப்பட்டது என்பது குறித்து ஃபிஃபாவோ அல்லது போட்டி நடுவர்களோ உடனடியாக விளக்கம் அளிக்கவில்லை.
இரண்டாம் பாதியின் தொடக்கத்தில் நடந்த ஒரு முக்கியமான VAR தலையீடு குறித்த எகிப்தின் விரக்தியை இந்த சர்ச்சை மேலும் அதிகரித்தது.
மொஹமட் சலாவுடன் அற்புதமாக இணைந்து விளையாடிய மோஸ்ட்கா ஜிகோ, எகிப்தின் முன்னிலையை இரட்டிப்பாக்கியது போல் தோன்றியது.
ஆனால், அதற்கு முந்தைய ஒரு சம்பவத்தை நடுவர் லெடெக்சியர் ஆய்வு செய்து, கோல் உருவாவதற்கு முன்பு ஆர்ஜென்டினா தடுப்பாட்டக்காரர் லிசாண்ட்ரோ மார்டினெஸ் மீது ஃபவுல் செய்யப்பட்டதாகத் தீர்ப்பளித்ததைத் தொடர்ந்து, அந்த கோல் நிராகரிக்கப்பட்டது.
பின்னர் ஜிகோ ஒரு முறையான கோலை அடித்தார், ஆனால் அதற்குள் ஆர்ஜென்டினா மீண்டு வந்து வெற்றியை உறுதி செய்திருந்தது.
மெஸ்ஸி கோல் அடித்து சமன் செய்த பிறகு, ஆட்டத்தின் இறுதியில் என்சோ பெர்னாண்டஸ் தலையால் முட்டி அடித்த பரபரப்பான கோல், 3-2 என்ற கோல் கணக்கில் வெற்றியை உறுதி செய்தது.
VAR-இன் முடிவு இணையத்தில் கடும் எதிர்ப்பைத் தூண்டியது; சில ஆதரவாளர்கள் நடுவர்கள் ஆர்ஜென்டினாவுக்குச் சாதகமாகச் செயல்படுவதாகக் குற்றம் சாட்டினர். இருப்பினும் ஆட்டம் முறைகேடாக நடத்தப்பட்டது என்ற கூற்றுகளுக்கு ஆதரவாக எந்த ஆதாரமும் இல்லை.
பிபிசி ரேடியோ 5 லைவ்-இல் பேசிய எகிப்திய கால்பந்து நிபுணர் அஹ்மத் யூசெஃப், நடுவர்களின் செயல்பாடுகளில் உள்ள சீரான தன்மையைக் கேள்விக்குள்ளாக்கினார்.
தற்போது VAR மற்றும் முடிவுகளிலும், ஒரு முடிவை எடுப்பதற்காக எவ்வளவு தூரம் பின்னோக்கிச் செல்ல வேண்டும் என்பதிலும் மிகுந்த சீரற்ற தன்மை நிலவுகிறது என்று யூசெஃப் கூறினார்.
எகிப்தின் இரண்டாவது கோலை நிராகரித்ததன் மூலம் நடுவர் தவறான முடிவை எடுத்தார்.
அங்கு மிக நீண்ட தூரம் கடந்துவிட்ட நிலையில், ஃபவுல் மிகவும் சிறியதாக இருந்தது.
எனவே, எகிப்திய பயிற்சி ஊழியர்களும் அணியினரும் ஏன் இவ்வளவு ஏமாற்றமடைந்துள்ளனர் என்பதை என்னால் முழுமையாகப் புரிந்துகொள்ள முடிகிறது என்றார்.
நடப்புச் சாம்பியன் என்ற முறையில் தங்கள் பட்டத்தைத் தக்கவைக்கும் முயற்சியில் மிகப்பெரிய சவால்களில் ஒன்றை வெற்றிகரமாகக் கடந்துள்ள ஆர்ஜென்டினா, இப்போது உலகக் கோப்பை காலிறுதிப் போட்டியில் சுவிட்சர்லாந்தை எதிர்கொள்ளவுள்ளது.
