ரிஃபார்ம் யுகே (Reform UK) கட்சியின் துணைத் தலைவர் ரிச்சர்ட் டைஸ் (Richard Tice), தனது தனிப்பட்ட நிதி விபரங்கள் ஊடகங்களுக்குக் கசிந்தது குறித்து விரிவான விசாரணை நடத்துமாறு பிரிட்டனின் தேசிய குற்றவியல் முகமையின் தலைவருக்குக் கடிதம் எழுதியுள்ளார்.
இந்தத் தகவல் கசிவுக்கு அந்த முகமையே காரணமா என்பதைக் கண்டறியுமாறு அவர் கோரியுள்ளார்.
ரிச்சர்ட் டைஸுக்குச் சொந்தமான நிறுவனங்களுக்கு மேற்கொள்ளப்பட்ட சில பணப் பரிமாற்றங்கள், தேசிய குற்றவியல் முகமையின் சந்தேகத்திற்கிடமான செயல்பாட்டு அறிக்கைகள் திட்டத்தின்கீழ் கொண்டுவரப்பட்டிருந்தன.
இதுகுறித்துக் ‘தி கார்டியன்’ நாளிதழ் தன்னிடம் விளக்கம் கேட்டபோதே, இந்த விபரங்கள் கசிந்திருப்பது தனக்குத் தெரியவந்ததாக ரிச்சர்ட் டைஸ் குறிப்பிட்டுள்ளார்.
எனவே இந்த ரகசியத் தகவல்கள் தேசிய குற்றவியல் முகமையிலிருந்துதான் கசிந்திருக்கக்கூடும் என்று ரிஃபார்ம் யுகே கட்சி குற்றம் சுமத்தியுள்ளமை குறிப்பிடத்தக்கது.
