தமிழ், தெலுங்கு, கன்னடம் மற்றும் இந்தி உள்ளிட்ட மொழிப் படங்களில் நடித்து வரும் நடிகை சமந்தா, தனது காலை நேரப் பழக்கவழக்கங்கள் குறித்த தகவல்களைப் பகிர்ந்துள்ளார்.
பிரபல இயக்குநர் ராஜ் நிடிமோருவைத் திருமணம் செய்துகொண்ட சமந்தா, தனது தனிப்பட்ட வாழ்க்கை மற்றும் அன்றாடப் பழக்கவழக்கங்கள் தொடர்பான தகவல்களை அவ்வப்போது சமூக வலைதளங்களில் பகிர்ந்து வருகிறார்.
அந்த வகையில், காலையில் எழுந்தவுடன் முதலில் நன்றி உணர்வு நாட்குறிப்பு எழுதுவதாக அவர் தெரிவித்துள்ளார். அன்றாட வாழ்க்கையில் நன்றி செலுத்த வேண்டிய விடயங்களை ஒரு பக்கம் முழுவதும் எழுதுவது தனது வழக்கமாக இருப்பதாகவும் குறிப்பிட்டுள்ளார்.
தான் கடினமான காலகட்டத்தை எதிர்கொண்டபோது இந்தப் பழக்கத்தைப் பின்பற்றுமாறு அறிவுறுத்தப்பட்டதாகவும், ஆரம்பத்தில் நேர்மறையான விடயங்களை எழுதுவது மிகவும் சவாலாக இருந்ததாகவும் அவர் கூறியுள்ளார்.
எனினும், சில மாதங்களுக்குப் பின்னர் தனது உடல்நிலையில் பெரிய மாற்றம் ஏற்படாவிட்டாலும், மனநிலையில் முன்னேற்றம் ஏற்பட்டதை உணர்ந்ததாகவும், இந்தப் பழக்கம் தனது வாழ்க்கையில் குறிப்பிடத்தக்க தாக்கத்தை ஏற்படுத்தியதாகவும் தெரிவித்துள்ளார்.
இதற்கு மேலதிகமாக, காலையில் 15 முதல் 20 நிமிடங்கள் வரை சூரிய ஒளியில் நேரத்தைச் செலவிடுவதாகவும், மன அழுத்தத்தைக் குறைத்து கவனத்தை மேம்படுத்துவதற்காக மூச்சுப் பயிற்சிகள் மற்றும் தியானத்தில் ஈடுபடுவதாகவும் சமந்தா குறிப்பிட்டுள்ளார்.
தனது அனுபவங்களைப் பகிர்ந்துள்ள அவர், நன்றி உணர்வு நாட்குறிப்பு எழுதுவது உள்ளிட்ட இத்தகைய காலை நேரப் பழக்கங்கள் மனநிலையை மேம்படுத்த உதவுவதாகத் தெரிவித்துள்ளார்.
