இஸ்ரேலில் இன்று தேர்தல் – நெதன்யாகுவின் அரசியல் எதிர்காலம் கேள்விக்குறி!

இஸ்ரேலில் செவ்வாய்க்கிழமை (27) நாடாளுமன்றத் தேர்தல் நடைபெறுகிறது.

2023 ஒக்டோபர் 7 அன்று ஹமாஸ் நடத்திய தாக்குதலுக்குப் பின்னர் நடைபெறும் முதல் தேர்தல் இதுவாகும்.

அந்தத் தாக்குதல் இஸ்ரேலை உலுக்கியதுடன், மத்திய கிழக்கையே பெரும் கொந்தளிப்புக்கு உள்ளாக்கியது.

இந்த தேர்தலில் பிரதமர் பெஞ்சமின் நெதன்யாகுவின் அதிகாரப் பிடிப்பு கேள்விக்குள்ளாகியுள்ளது.

இந்த தேர்தலில், பிரதமர் பெஞ்சமின் நெதன்யாகு தனது அரசியல் இருப்பைத் தக்கவைத்துக் கொள்ளப் போராடுகிறார். 

2023 இல் ஹமாஸ் நடத்திய தாக்குதல்கள், காசாவிலும் ஈரானுடனும் நடைபெற்று வரும் போர்கள், மற்றும் சர்வதேச அளவில் இஸ்ரேல் மேலும் தனிமைப்படுத்தப்பட்டு வருவது போன்ற சூழலில், வாக்காளர்கள் அவரது தலைமையைக் குறித்து மறுபரிசீலனை செய்து வருகின்றனர்.

இருப்பினும், 19 ஆண்டுகள் பதவியில் இருந்து இஸ்ரேலின் நீண்டகாலத் தலைவராகத் திகழும் நெதன்யாகு, ஒரு வலிமையான பிழைப்புவாதியாகத் தொடர்ந்து நீடிக்கிறார்.

அங்கு தேசியவாத அரசியல் மேலும் ஆழமாக வேரூன்றியுள்ள சூழலிலும், இஸ்ரேலின் சிதறிய அரசியல் கட்டமைப்பு காரணமாக, மீண்டும் அரசாங்கத்தை அமைப்பதற்கு அவரே மிகவும் சாதகமான நிலையில் உள்ளார்.

கருத்துக் கணிப்புகள், நெதன்யாகுவின் லிகுட் கட்சி மற்றும் அதன் வலதுசாரி கூட்டணிக் கட்சிகளுக்கும், முன்னாள் இராணுவத் தலைமைத் தளபதியும் பாதுகாப்பு விவகாரங்களில் தீவிர நிலைப்பாடு கொண்டவருமான காடி ஐசென்கோட் தலைமையிலான போட்டி கூட்டணிக்கும் இடையே கடும் போட்டி நிலவுவதைக் காட்டுகின்றன.

ஐசென்கோட்டின் இந்த கூட்டணியில் வலதுசாரி மற்றும் மையவாத ஆதரவாளர்கள் இடம்பெற்றுள்ளனர்.

நெதன்யாகு தனது போர்க்காலத் தலைமைத்துவத்தையும், அமெரிக்க ஜனாதிபதி டொனால்ட் ட்ரம்புடன் தனக்குள்ள கூட்டணியையும் முன்னிறுத்தித் தேர்தல் பிரச்சாரம் செய்து வருகிறார். 

ட்ரம்ப் அவருக்கு ஆதரவு தெரிவித்துள்ளதோடு, ஈரானுக்கு எதிரான போரில் இஸ்ரேலுடன் இணைந்து செயல்பட்டு வருகிறார். 

ஈரானிய அச்சுறுத்தலை “முழுமையாக” ஒழிப்பதற்கு ட்ரம்ப் மீண்டும் நடவடிக்கை எடுக்கத் தயாராக இருப்பதாகவும், ஆனால் அதற்கு நெதன்யாகு தொடர்ந்து அதிகாரத்தில் இருக்க வேண்டும் என்றும் அவர் கடந்த ஞாயிற்றுக்கிழமை தெரிவித்தார்.

அரசாங்கத்தை அமைப்பதற்கு நெதன்யாகு மீண்டும் தீவிர வலதுசாரி தலைவர்களான இடாமர் பென்-கிவிர் மற்றும் பெசலெல் ஸ்மோட்ரிச் ஆகியோரைச் சார்ந்திருக்க வேண்டிய சூழல் ஏற்படலாம். 

இவர்கள் இருவரும் பாலஸ்தீனியர்களுக்கு எதிராக வன்முறையைத் தூண்டியதாகக் குற்றம் சாட்டப்பட்டு, சில மேற்கத்திய நாடுகளின் தடைகளுக்கு உள்ளாகியுள்ளனர். 

அதே வேளையில், பென்-கிவிரின் ‘யூத சக்தி’ (Jewish Power) கட்சிக்குக் கருத்துக்கணிப்புகளில் ஆதரவு அதிகரித்துள்ளது.

நெதன்யாகு அல்லது ஐசென்கோட் ஆகிய இருவரில் யாருக்கும் ஆட்சி அமைப்பதற்கான தெளிவான வாய்ப்பு இல்லை. 

120 இடங்களைக் கொண்ட நாடாளுமன்றத்தில் இவர்களில் யாராலும் கூட்டணி அமைத்து அரசாங்கத்தை உருவாக்க முடியாவிட்டால், அடுத்த ஆண்டு தேர்தல் நடைபெறும் வரை நெதன்யாகு இடைக்காலப் பிரதமராகத் தொடரக்கூடும்.

வாக்குப்பதிவு உள்ளூர் நேரப்படி செவ்வாய் காலை 7 மணி முதல் இரவு 10 மணி வரை (GMT நேரம் 0500 முதல் 2000 வரை) நடைபெறும். 

மத்தியவாதப் பிரிவைச் சேர்ந்த அவரது அரசியல் போட்டியாளர்கள் ஒரு புதிய சகாப்தத்தை உருவாக்க உறுதியளித்துள்ளனர். 

தேர்தல் முடிவுகள் எவ்வாறு வெளியிடப்படும்?

வாக்குப்பதிவு காலை 7 மணிக்கு (0500 GMT) தொடங்கி இரவு 10 மணிக்கு (2000 GMT) நிறைவடைகிறது. 

அந்த நேரத்தில், இஸ்ரேலிய தொலைக்காட்சி சேனல்கள் வாக்குப்பதிவுக்குப் பிந்தைய கருத்துக்கணிப்புகளை (exit polls) ஒளிபரப்பும்.

இவை தேர்தல் முடிவுகள் குறித்த ஆரம்ப அறிகுறியை வழங்கும். 

அதனைத் தொடர்ந்து தேர்தல் முடிவுகள் வரத் தொடங்கும்.

தேர்தல் முடிவுகளின் தெளிவான நிலவரம் விரைவிலேயே தெரியவரக்கூடும்; ஆனால், எந்தவொரு கட்சியோ அல்லது கட்சிகளின் கூட்டணியோ நாடாளுமன்றத்தில் தெளிவான பெரும்பான்மையைப் பெறவில்லை என்றால், முடிவுகள் தெரிய வர நீண்ட காலம் எடுக்கலாம்.

ஒக்டோபர் 30-க்குள் இறுதி நிலவரம் தெரியவரும் என்று எதிர்பார்க்கப்படுகிறது. 

அதிகாரப்பூர்வ தேர்தல் முடிவுகள், தேர்தலுக்கு ஒரு வாரம் கழித்து, நவம்பர் 4-ம் திகதி முறையாக வெளியிடப்படும்.

முடிவுகளின் தாமதத்துக்கான காரணம் என்ன?

120 இடங்களைக் கொண்ட கெனெசெட் (Knesset) நாடாளுமன்றுக்கான தேர்தல்கள் நான்கு ஆண்டுகளுக்கு ஒருமுறை நடத்தப்பட வேண்டும், ஆனால் அடிக்கடி முன்கூட்டியே தேர்தல்கள் நடத்தப்படுகின்றன.

கெனெசெட் இடங்கள், தேசிய அளவிலான கட்சிப் பட்டியல்களுக்கு விகிதாசாரப் பிரதிநிதித்துவ அடிப்படையில் ஒதுக்கப்படுகின்றன.

ஒரு கட்சி இடங்களைப் பெறுவதற்கு, தேசிய வாக்குகளில் குறைந்தது 3.25 சதவீதத்தைப் பெற வேண்டியது அவசியமாகும்.

சுமார் பன்னிரண்டு கட்சிகள் தேர்தல் தகுதிக்கான வரம்பைக் கடக்க வாய்ப்புள்ளதாகப் பரவலாகக் கருதப்படுகிறது.

எனவே, இறுதி முடிவுகள் மற்றும் இட ஒதுக்கீடு குறித்த விவரங்கள் தெரிய வர காலமாகும்.