ஸ்பெயின் நாட்டின் சாம்பியனான பார்சிலோனா கால்பந்து கழகம், நியூகாஸில் யுனைடெட் அணியின் நட்சத்திர விங்கர் (Winger) ஆண்டனி கார்டனை (Anthony Gordon) அதிகாரப்பூர்வமாக ஒப்பந்தம் செய்துள்ளதாக அறிவித்துள்ளது.
25 வயதான இந்த இங்கிலாந்து வீரர், பார்சிலோனா அணியுடன் ஐந்து ஆண்டுகால ஒப்பந்தத்தில் கையெழுத்திட்டுள்ளார்.
இந்த ஒப்பந்தத்தின் நிதி விபரங்கள் அதிகாரப்பூர்வமாக வெளியிடப்படவில்லை என்றாலும், பார்சிலோனா அணி ஆரம்பத் தொகையாக 80 மில்லியன் யூரோக்களை நியூகாஸிலுக்கு வழங்கியுள்ளதாக பிரித்தானிய ஊடகங்கள் செய்தி வெளியிட்டுள்ளன.
ஆண்டனி கார்டனின் திறமை குறித்துப் பார்சிலோனா அணி வெளியிட்டுள்ள அறிக்கையில் ,
“கடந்த சீசனில் நியூகாஸில் யுனைடெட் அணியின் அதிக கோல்களை அடித்தவராகவும், மைதானத்தில் அதிக ‘டிரிபிள்ஸ்’ செய்த வீரராகவும் திகழ்ந்த பின்னரே கார்டன் எங்கள் கழகத்தில் இணைகிறார்.
குறிப்பாக, கடந்த சீசன் சாம்பியன்ஸ் லீக் தொடரில் பார்சிலோனாவுக்கு எதிராக அவர் விளையாடிய மூன்று போட்டிகளிலும் எங்களை மிகவும் கவர்ந்திருந்தார்.”
கார்டன் இந்த சீசனில் நியூகாஸில் அணிக்காக அனைத்து போட்டிகளிலும் சேர்த்து 17 கோல்களை அடித்துள்ளார்.
இதில் சாம்பியன்ஸ் லீக்கின் 12 போட்டிகளில் அடித்த 10 கோல்களும் அடங்கும்.
இருப்பினும், நியூகாஸில் அணி பிரீமியர் லீக்கில் 12ஆவது இடத்தைப் பிடித்து ஐரோப்பிய தொடர்களுக்குத் தகுதிபெறத் தவறியமை குறிப்பிடத்தக்கது.
கடந்த 2023 ஜனவரியில் எவர்டன் அணியில் இருந்து 45 மில்லியன் பவுண்டுகளுக்கு நியூகாஸில் அணிக்கு வந்த கார்டன், அங்கு பல சாதனைகளைப் படைத்துள்ளார்.
ஏற்கனவே மான்செஸ்டர் யுனைடெட் அணியில் இருந்து லோன் அடிப்படையில் பார்சிலோனா அணியில் இணைந்த மார்கஸ் ராஷ்ஃபோர்ட் (Marcus Rashford), இந்த சீசனில் 14 கோல்கள் மற்றும் 14 அசிஸ்டுகளை வழங்கி பார்சிலோனா லா லிகா பட்டத்தைத் தக்கவைக்க உதவினார்.
ராஷ்ஃபோர்ட்டை 30 மில்லியன் யூரோவிற்கு நிரந்தரமாக வாங்கும் வாய்ப்பு ஜூன் 15 வரை பார்சிலோனாவிடம் உள்ளது.
ஆண்டனி கார்டனின் இந்த இடமாற்றத்தின் மூலம் ஹாரி கேன் , ஜூட் பெலிங்ஹாம் மற்றும் இவான் டோனி ஆகியோரைத் தொடர்ந்து வெளிநாட்டு லீக்குகளில் விளையாடும் இங்கிலாந்து நட்சத்திரங்களின் பட்டியலில் அவரும் இணைந்துள்ளார்.
