ஈரானுடன் விரைவான ஒப்பந்தம் ஏற்படும் என்ற நம்பிக்கையில், அந்த நாட்டின் மீது புதிய தாக்குதல்களை நடத்துவதை அமெரிக்க ஜனாதிபதி டொனால்ட் ட்ரம்ப் ஒத்திவைத்ததைத் தொடர்ந்து மசகு எண்ணெய் விலை சரிந்தது.
இதனால் பணவீக்கம் மற்றும் வட்டி விகித உயர்வு குறித்த கவலைகள் சற்று தணிந்த நிலையில், திங்களன்று (03) வர்த்தகத்தில் தங்கத்தின் விலை உயர்ந்தது.
04.37 GMT நிலவரப்படி, ஸ்பாட் தங்கத்தின் விலை அவுன்ஸிற்கு 0.7% உயர்ந்து 4,068.54 டொலராக இருந்தது.
அமெரிக்கத் தங்க எதிர்கால ஒப்பந்தங்களின் விலை 0.9% உயர்ந்து 4,066.60 டொலராக இருந்தது.
அமெரிக்கா-ஈரான் இடையிலான மோதல் தொடங்கியதிலிருந்து தங்கத்தின் விலை அழுத்தத்திற்கு உள்ளாகியுள்ளது.
ஏனெனில், போரினால் தூண்டப்படும் பணவீக்க உயர்வு, வட்டி விகிதங்களை உயர்த்துமாறு மத்திய வங்கிகளை தூண்டியுள்ளது.
பணவீக்கத்திற்கு எதிரான ஒரு பாதுகாப்பாகத் தங்கம் பாரம்பரியமாகப் பார்க்கப்பட்டாலும், அதிக வட்டி விகிதங்கள் நிலவும் சூழலில் அதன் மீதான ஈர்ப்பு குறைந்துள்ளது.
பருவகாலத் தேவை காரணமாக மீட்சியடைவதற்கு முன்னதாக, தங்கம் குறுகிய கால அடிப்படையில் விலை ஆதரவு நிலையை எட்டும் என்று தொடர்ந்து எதிர்பார்ப்பதாக ஸ்டாண்டர்ட் சார்ட்டர்ட் (Standard Chartered) நிறுவனத்தின் ஆய்வாளர்கள் தங்கள் குறிப்பு ஒன்றில் தெரிவித்துள்ளனர்.
இதனிடையே திங்கள் வர்த்தகத்தில் ஸ்பாட் வெள்ளி (spot silver) 1.4% உயர்ந்து 58.46 டொலராகவும், பிளாட்டினம் 0.5% உயர்ந்து 1,650.63 டொலராகவும், பல்லேடியம் 1.6% உயர்ந்து 1,293.50 டொலராகவும் பதிவாகின.
அதேநேரம், ஈரானுடன் திங்களன்று பேச்சுவார்த்தை நடைபெறும் என்று ஜனாதிபதி டொனால்ட் ட்ரம்ப் கூறியதைத் தொடர்ந்து, பிரென்ட் மசகு எண்ணெய் எதிர்கால ஒப்பந்தங்கள் 4%க்கும் மேல் சரிந்து 83.88 அமெரிக்க டொலர்களாகக் குறைந்தன.
முன்னதாக, ஹார்முஸ் நீரிணையை மீண்டும் திறப்பதற்கான ஒப்பந்தத்தை எட்டுவதற்கும், தெஹ்ரானின் அணுசக்தித் திறன்கள் குறித்த முட்டுக்கட்டையைத் தீர்ப்பதற்கும் ஈரான் மீதான உடனடித் தாக்குதலை அவர் இரத்து செய்திருந்தார்.
