மோசமான அனிமேஷன் மற்றும் குழப்பமான கதைக்களத்திற்காக சமூக வலைத்தளங்களில் வைரலான குறைந்த பட்ஜெட் சீன அனிமேஷன் திரைப்படமொன்று, பாக்ஸ் ஆபிஸ் சாதனைகளை முறியடித்துப் பெருமளவில் வசூல் சாதனை படைத்துள்ளது.
பசு ஒன்றைப் பற்றிய கனவை அடிப்படையாகக் கொண்டு உருவாக்கப்பட்ட இத்திரைப்படம், திரையிடப்பட்ட முதல் 10 நாட்களில் வெறும் 7,705 சீன யுவான்களை மட்டுமே ஈட்டியிருந்தது.
இருப்பினும், சமூக ஊடகங்களில் வைரலானதைத் தொடர்ந்து, தற்போது 11.4 மில்லியனுக்கும் அதிகமான லாபத்தைப் பதிவு செய்து முன்னணி ஹாலிவுட் திரைப்படங்களுக்கும் சவால் விடுக்கும் வகையில் உருவெடுத்துள்ளது.
சமூக ஊடக அல்காரிதம்களை ஆக்கிரமித்துள்ள செயற்கை நுண்ணறிவு (AI) கழிவுகளுக்கு இத்திரைப்படம் சிறந்த மாற்றாக அமைந்துள்ளதாகப் பயனர்கள் கருத்துத் தெரிவித்து வருகின்றனர்.
செயற்கை நுண்ணறிவைப் பயன்படுத்தாமல் கையால் உருவாக்கப்பட்ட இந்த அனிமேஷன், ரசிகர்களால் “உண்மையான கைவினைத்திறன்” எனப் பாராட்டப்படுகிறது.
மேலும், சீன மொழியில் ‘காளை’ மற்றும் ‘பசு’ ஆகிய சொற்கள் ஒரே எழுத்தைக் குறிப்பதால், ‘பங்குச் சந்தை ஏற்றமடையும்’ என்ற நம்பிக்கையில் படத்தின் தலைப்பால் கவரப்பட்ட ரசிகர்களும் திரையரங்குகளுக்கு அதிகளவில் படையெடுத்து வருகின்றனர்.
அதிகாரப்பூர்வ விளம்பரச் சுவரொட்டிகள் இல்லாததால், சில திரையரங்கு ஊழியர்கள் கையால் வரைந்த சுவரொட்டிகளையே விளம்பரத்திற்காகப் பயன்படுத்தி வருகின்றனர்.
அதேவேளை, இதுபோன்ற தரம் குறைந்த படங்கள் தொடர்ந்து திரையிடப்பட்டால், திரையரங்குகள் மீதான பார்வையாளர்களின் நம்பிக்கை பாதிக்கப்படலாம் எனச் சீன அரசுச் செய்தித்தாள் ஒன்று எச்சரிக்கை விடுத்துள்ளது.
