ஆர்ஜென்டினாவின் மரியானோ நவோனிக்கு எதிரான அமெரிக்க ஓபன் (US Open) முதல் சுற்றுப் போட்டியில் தோல்வியடைந்தபோது நோவக் ஜோகோவிச் கண்ணீர் விட்டார்.
39 வயதான இந்தச் சிறந்த வீரரை வயது முதிர்வு வேகமாகப் பீடித்து வருகிறது என்பதற்கு இந்த தோல்வி மேலும் ஒரு சான்றாக அமைந்தது.
இந்த தோல்வியன் மூலம் சாதனை அளவிலான 25 ஆவது கிராண்ட் ஸ்லாம் பட்டத்தை வெல்லும் அவரது முயற்சிக்குத் தடை ஏற்பட்டது.
நியூயோர்க்கின் புழுக்கமான சூழலில் நடந்த போட்டியில் தரவரிசையில் நான்காவது இடத்தில் இருந்த ஜோகோவிச், ஒரு செட் பின்தங்கிய நிலையிலிருந்து மீண்டு வந்து போராடினார்.
இருப்பினும், போட்டி முழுவதும் கடுமையான உடல்நலச் சிக்கல்களை எதிர்கொண்ட அவர், இறுதியில் 6-7, 7-5, 6-4, 2-6, 1-6 என்ற கணக்கில் தோல்வியடைந்தார்.
2006 ஆம் ஆண்டிற்குப் பிறகு ஒரு கிராண்ட் ஸ்லாம் தொடரின் முதல் சுற்றில் அவர் தோல்வியடைந்ததும் இதுவே முதல் முறையாகும்.
ஆர்தர் ஆஷ் அரங்கில் போட்டியின் ஆரம்பத்திலிருந்தே ஜோகோவிச் உடல்ரீதியான சிரமங்களை எதிர்கொண்டது தெளிவாகத் தெரிந்தது.
மோசமான வானிலை காரணமாக அரங்கின் மேற்கூரை மூடப்படுவதற்கு முன்பே, 39 வயதான அவர் தனது தலையில் அடிக்கடி ஐஸ் பையை வைத்துக்கொண்டமையும் குறிப்பிடத்தக்கது.
