புத்தல – கதிர்காமம் பாதையில், யால வனவிலங்கு சரணாலயத்திற்கு அருகில், காட்டு யானை தாக்கியதைத் தொடர்ந்து யாத்ரீகர்கள் குழுவை ஏற்றிச் சென்ற பேருந்து ஒன்று சாலையிலிருந்து கவிழ்ந்து விபத்துக்குள்ளானதில், பலர் காயமடைந்து இன்று (03) கதிர்காமம் மருத்துவமனையில் அனுமதிக்கப்பட்டனர்.
கதிர்காமம் – புத்தல வீதியில் சுமார் 40 பயணிகளுடன் சென்ற தனியார் பேருந்து ஒன்று காட்டு யானையின் தாக்குதலுக்குள்ளாகி விபத்துக்குள்ளானது.
இந்த விபத்து இன்று (03) முற்பகல் சுமார் 11.00 மணியளவில் இடம்பெற்றுள்ளது.
கதிர்காமம் பொலிஸ் நிலைய எல்லைக்குட்பட்ட பகுதியில் உள்ள மின்வேலி சோதனைச் சாவடிக்கு அருகில் இச்சம்பவம் நடைபெற்றது.
சிலாபத்திலிருந்து கதிர்காமத்திற்கு யாத்ரீகர்கள் குழுவை அழைத்துச் சென்ற பின்னர், அந்தப் பேருந்து புத்தளவை நோக்கிச் சென்று கொண்டிருந்தது.
சாலையில் நின்றிருந்த காட்டு யானை ஒன்று திடீரென அப்பேருந்தைத் தாக்கியதாக தெரிவிக்கப்படுகிறது.
தாக்குதலுக்குப் பின்னர் சாரதியின் கட்டுப்பாட்டை இழந்த வாகனம், சாலையிலிருந்து விலகிச் சென்று கவிழ்ந்தது.
இவ்விபத்தில் சுமார் 10 பயணிகள் காயமடைந்தனர்; அவர்கள் மருத்துவ சிகிச்சைக்காக கதிர்காமம் வைத்தியசாலையல் அனுமதிக்கப்பட்டனர்.
காயமடைந்த பயணிகள் எவருடைய நிலைமையும் கவலைக்கிடமாக இல்லை என்று வைத்தியசாலை வட்டாரங்கள் தெரிவித்தன.
இச்சம்பவம் குறித்து பொலிஸார் மேலதிக விசாரணைகளை மேற்கொண்டு வருகின்றனர்.
