சீன ஜனாதிபதி ஜி ஜின்பிங் இந்த வாரம் அமெரிக்காவில் அரசுமுறைப் பயணம் மேற்கொள்வார் என்று திங்களன்று (21) பெய்ஜிங் உறுதிப்படுத்தியது.
ஈரான் போர்ச் சூழலுக்கு மத்தியில், உலக அமைதி குறித்து சீன மற்றும் அமெரிக்கத் தலைவர்கள் கருத்துக்களைப் பரிமாறிக் கொள்வார்கள் என்றும் அது நம்பிக்கை வெளியிட்டுள்ளது.
இது தொடர்பான அறிவிப்பில் பெய்ஜிங்கின் வெளிவிவகார அமைச்சு, அமெரிக்க ஜனாதிபதி டொனால்ட் ஜே. ட்ரம்ப்பின் அழைப்பின் பேரில், ஜனாதிபதி ஜி ஜின்பிங் செப்டம்பர் 23 முதல் 25 வரை அமெரிக்காவில் அரசுமுறைப் பயணம் மேற்கொள்வார் என்று கூறியுள்ளது.
முன்னாள் ஜனாதிபதி பராக் ஒபாமாவின் அழைப்பின் பேரில் 2015 செப்டம்பரில் மேற்கொண்ட பயணத்திற்குப் பின்னர், அமெரிக்காவிற்கு ஜி ஜின்பிங் மேற்கொள்ளும் முதல் அரசுமுறைப் பயணம் இதுவாக இருக்கும்.
பின்னர், 2017-இல் ட்ரம்ப் தனது முதல் பதவிக்காலத்தில் இருந்தபோது ஜி ஜின்பிங் அவரைச் சந்தித்தார்.
ஜி ஜின்பிங் 2023-இல் அமெரிக்காவிற்குப் பயணம் மேற்கொண்டு, ஆசிய-பசிபிக் பொருளாதார ஒத்துழைப்பு (APEC) தலைவர்கள் உச்சிமாநாட்டின் ஒரு பகுதியாக அப்போதைய ஜனாதிபதி ஜோ பைடனைச் சந்தித்தார்.
ஆனால், இது ஒரு அரசுமுறைப் பயணமாக அமையவில்லை.
இந்த நிலையில், புதன் மற்றும் வெள்ளிக்கிழமைக்கு இடைப்பட்ட காலத்தில் நடைபெறவுள்ள இந்தப் பயணம், மே மாதத்தில் ட்ரம்ப் சீனாவில் மேற்கொண்ட அரசுமுறைப் பயணத்தைத் தொடர்ந்து அமைகிறது.
அமெரிக்க ஊடக அறிக்கைகளின்படி, வொஷிங்டனுக்கு அருகிலுள்ள மேரிலாந்தில் உள்ள ஜாயின்ட் பேஸ் ஆண்ட்ரூஸ் விமான நிலையத்தில், ஜி ஜின்பிங்கை ட்ரம்ப் வரவேற்பார் என எதிர்பார்க்கப்படுகிறது.
மின்சார வாகனத் தயாரிப்பாளரான BYD மற்றும் ஸ்மார்ட் உற்பத்தி நிறுவனமான சியோமி உள்ளிட்ட உயர் அதிகாரிகள் சீன ஜனாதிபதியுடன் இந்த பயணத்தில் பங்கெடுப்பார்கள் என்றும் எதிர்பார்க்கப்படுகிறது.
