ஜப்பானின் நிஷினில் உள்ள கோரோகி விளையாட்டுப் பூங்காவில் இன்று (22) நடைபெற்ற இறுதிப் போட்டியில் இலங்கை அணியை 147 ஓட்டங்கள் வித்தியாசத்தில் வீழ்த்தி, ஆசிய விளையாட்டுப் போட்டிகளில் இந்திய மகளிர் கிரிக்கெட் அணி தங்கப் பதக்கத்தை வென்றது.
2018-இல் மலேசியாவுக்கு எதிராகப் பெற்ற 144 ஓட்டங்கள் வித்தியாசத்திலான வெற்றியை முறியடித்து, மகளிர் டி20 சர்வதேசப் போட்டிகளில் இந்தியா பெற்ற மிகப்பரிய வெற்றி இதுவாகும்.
2023 ஆம் ஆண்டு ஹாங்சூ விளையாட்டுப் போட்டிகளின் இறுதி ஆட்டத்தில் இதே எதிரணியை வீழ்த்திய மூன்று ஆண்டுகளுக்குப் பின்னர், மீண்டும் ஒரு சிறப்பான ஆட்டத்தை வெளிப்படுத்தி சாம்பியன் பட்டத்தை வென்றதன் மூலம், தற்போது நடைபெற்று வரும் போட்டிகளில் இந்தியா தனது தங்கப் பதக்கக் கணக்கைத் தொடங்கியது.
இறுதிப் போட்டியில் நாணய சுழற்சியில் வென்ற இந்தியா முதலில் துடுப்பாட்டம் செய்யத் தீர்மானித்தது.
அதனைத் தொடர்ந்து, தொடக்க ஆட்டக்காரர்களான ஸ்மிருதி மந்தனா, ஷஃபாலி வர்மா மற்றும் விக்கெட் காப்பாளர் ரிச்சா கோஷ் ஆகியோர் தலைமையிலான அணி சாதனை படைக்கும் வகையிலான ஆட்டத்தை வெளிப்படுத்தியது.
ஷஃபாலி மற்றும் மந்தனா ஜோடி, 99 ஓட்டங்கள் கொண்ட சிறப்பான கூட்டணியை அமைத்து, இலங்கை அணிக்கு ஆரம்பக்கட்ட விக்கெட்டுகளை வீழ்த்தும் வாய்ப்பை மறுத்ததோடு, டி20 சர்வதேசப் போட்டிகளில் 4000 ஓட்டங்களை கடந்த முதல் ஜோடியாகவும் சாதனை படைத்தது.
நல்ல ஃபார்மில் இருந்த ஷஃபாலி 48 ஓட்டங்களில் ஆட்டமிழந்தாலும், வழக்கத்திற்கு மாறாக அதிரடியாக ஆடிய மந்தனா தனது 37-வது டி20 சர்வதேச அரைசதத்தைப் பதிவு செய்ததுடன், சர்வதேச கிரிக்கெட்டில் 11,000 ஓட்டங்கள் என்ற மைல்கல்லையும் எட்டினார்.
ஐந்து பவுண்டரிகள் மற்றும் ஏழு சிக்ஸர்களுடன் மந்தனா விளாசிய 79 ஓட்டங்கள் அணிக்கு வலுவான ஓட்ட எண்ணிக்கையை பெறுவதற்கு அடித்தளத்தை ஏற்படுத்திக் கொடுத்தன.
அதனைத் தொடர்ந்து, நான்காவது வரிசையில் களமிறங்கிய ரிச்சா கோஷ் அந்தப் பொறுப்பைச் சிறப்பாக முன்னெடுத்துச் சென்றார்.
வலது கை வீராங்கனையான கோஷ், வெறும் 22 பந்துகளில் அதிரடியாக 49 ஓட்டங்களை குவிக்க, இந்திய அணி 3 விக்கெட் இழப்புக்கு 216 ஓட்டங்களை எட்டியது.
இது ஆசிய விளையாட்டுப் போட்டிகளின் வரலாற்றில் இதுவரை நடைபெற்ற நான்கு சீசன்களில் மகளிர் டி20 கிரிக்கெட்டில் பதிவு செய்யப்பட்ட மிக உயர்ந்த ஓட்ட எண்ணிக்கையாகும்.
பின்னர், பகுதிநேரப் பந்துவீச்சாளரான ஷஃபாலி பவர்பிளேயின் உள்ளேயே இரண்டு விக்கெட்டுகளை வீழ்த்தி ஆரம்ப துடுப்பாட்ட இணைப்பாட்டத்தை உடைத்ததால், இலங்கையின் சேஸிங் வேகம் எடுக்கவே இல்லை.
தீப்தி ஷர்மா மற்றும் ஸ்ரீ சரணி ஆகியோரின் பங்களிப்புடனும் சுழற்பந்து வீச்சு மேலும் வலுப்பெற்றது.
இதனால் 10 ஓவர்களுக்குள் இலங்கை 49 ஓட்டங்களுக்கு 6 விக்கெட்டுகளை இழந்தது.
இறுதியாக 15.4 ஓவர்களில் இலக்கை எட்ட முடியாமல் 67 ஓட்டங்களுடன் ஆட்டமிழந்து இலங்கை படுதோல்வியைத் தழுவியது.
ஜூன் மாதத்தில் நடைபெற்ற 2026 டி20 உலகக் கிண்ணத்தின் குழுச் சுற்றிலேயே வெளியேறியதிலிருந்து, ஹர்மன்ப்ரீத் கௌர் தலைமையிலான அணி தொடர்ந்து ஒன்பது போட்டிகளில் தோல்வியைச் சந்திக்காமல் சிறப்பான ஆட்டத்தை வெளிப்படுத்தி வருகிறது.
லோர்ட்ஸ் மைதானத்தில் இங்கிலாந்துக்கு எதிரான ஒரே ஒரு டெஸ்ட் போட்டியில் பெற்ற வெற்றியுடன் தொடங்கிய இந்த வெற்றிப் பயணம், 2026 ஆசியக் கிண்ணத்தை வென்றதன் மூலம் மேலும் வலுப்பெற்றது.
இது நடைபெற்ற 10 தொடர்களில் இந்தியா வென்ற எட்டாவது ஆசியக் கிண்ணமாகும்.
குழுச் சுற்றில் தாய்லாந்து, ஹாங்கொங் மற்றும் பாகிஸ்தான் ஆகிய அணிகளைத் துவம்சம் செய்த இந்தியா, பின்னர் அரையிறுதி மற்றும் இறுதிப் போட்டிகளில் முறையே பங்களாதேஷ் மற்றும் இலங்கை அணிகளை வீழ்த்தியது.
2010 ஆம் ஆண்டு முதல் ஆசிய விளையாட்டுப் போட்டிகளில் கிரிக்கெட் சேர்க்கப்பட்டது; 2018-ஆம் ஆண்டைத் தவிர மற்ற அனைத்துப் போட்டிகளிலும் இது இடம்பெற்றுள்ளது.
இருப்பினும், ஹாங்சூவில் நடைபெற்ற போட்டிகள் வரை இந்தியா இதில் பங்கேற்கவில்லை; அப்போட்டியில் இந்தியா சாம்பியன் பட்டத்தை வென்றது. இப்போட்டித் தொடரில் தொடர்ந்து வெற்றி பெற்றதன் மூலம், தங்கப் பதக்கத்தைத் தக்கவைத்த அணிகளாக பாகிஸ்தானுடன் (2010, 2014) இணைந்து இந்தியாவும் அந்தச் சிறப்பைப் பெற்றுள்ளது.
காலிறுதிக்கு நேரடியாகத் தகுதி பெற்றுள்ள இந்திய ஆடவர் கிரிக்கெட் அணி, அடுத்ததாக செப்டம்பர் 28 அன்று நடைபெறவுள்ள போட்டிகளில் தங்கப் பதக்கத்தைத் தக்கவைக்கும் முயற்சியில் களமிறங்கவுள்ளது.
