திருவானந்தபுரத்தில் நேற்று (28) நடந்த மேற்கிந்தியத் தீவுகளுக்கு எதிரான முதல் ஒருநாள் போட்டியில் இந்தியா எட்டு விக்கெட் வித்தியாசத்தில் எளிதாக வெற்றி பெற்றது.
இந்தப் போட்டியில் ஆட்டமிழக்காமல் சதம் அடித்து 15,000 ஒருநாள் போட்டி ஓட்டங்களைக் கடந்த இரண்டாவது துடுப்பாட்ட வீரர் என்ற சாதனையை விராட் கோலி படைத்தார்.
இச்சாதனையை இதற்கு முன் சச்சின் டெண்டுல்கர் மட்டுமே நிகழ்த்தியிருந்தார்.
கோலியின் அசத்தான சதத்துடன், 296 ஓட்டங்கள் என்ற இலக்கை இந்தியா 50 பந்துகள் மீதமிருக்கவே எட்டிப்பிடித்து மூன்று போட்டிகள் கொண்ட ஒருநாள் தொடரில் 1-0 என்ற கணக்கில் முன்னிலை பெற்றது.
இதில் கோலி 88 பந்துகளில் ஆட்டமிழக்காமல் 139 ஓட்டங்களும், ஷுப்மன் கில் 110 ஓட்டங்களும் குவித்தனர்.
போட்டியில் முதலில் துடுப்பாட்டம் செய்த ஜஸ்டின் கிரீவ்ஸ் மற்றும் ஜான் கேம்ப்பெல் ஆகியோர், முதல் விக்கெட்டுக்கு 117 பந்துகளில் 135 ஓட்டங்களைச் சேர்த்து மேற்கிந்தியத் தீவுகள் அணிக்கு வலுவான தொடக்கத்தை அமைத்துக் கொடுத்தனர்.
அந்த ஜோடி பந்துவீச்சை ஆதிக்கம் செலுத்தி வலுவான அடித்தளத்தை அமைத்துக் கொடுத்ததால், முதல் 20 ஓவர்களில் பெரும்பாலான நேரம் இந்தியா ஒரு திருப்புமுனையை ஏற்படுத்தப் போராடியது.
16 ஓட்டங்கள் இருந்தபோது ரோஹித் ஷர்மாவால் பிடியெடுப்பு நழுவவிடப்பட்ட கிரீவ்ஸ், தனது முதல் ஒருநாள் சர்வதேச சதத்தை அடித்து இந்தியாவிற்குப் பதிலடி கொடுத்ததுடன், அந்த அணியின் சார்பில் அதிக ஓட்டங்களையும் குவித்தார்.
20-வது ஓவரில் குல்தீப் யாதவ், கேம்ப்பெல்லை ஆட்டமிழக்கச் செய்தபோது ஆட்டத்தின் போக்கு மாறியது.
அதைத் தொடர்ந்து யாதவும் பிரசித் கிருஷ்ணாவும் ஓட்ட வேகத்தைக் கட்டுப்படுத்த, 31 முதல் 36 ஓவர்களுக்கு இடையில் மேற்கிந்திய தீவுகள் அணி 22 ஓட்டங்களுக்கு நான்கு விக்கெட்டுகளை இழந்தது.
ஒருநாள் போட்டிகளில் மீண்டும் களமிறங்கிய யாதவ் 40 ஓட்டங்களுக்கு 4 விக்கெட்டுகளை வீழ்த்தினார்.
எனினும், அமீர் ஜங்கு 43 பந்துகளில் 58 ஓட்டங்கள் குவித்து அதிரடியாகப் பதிலடி கொடுத்தார்.
சேஸின் உதவியுடன், 198 ஓட்டங்களுக்கு 5 விக்கெட்டுகளை இழந்திருந்த நிலையில் இருந்து அணியை மீட்ட அவர், மேற்கிந்தியத் தீவுகள் அணி 295 ஓட்டங்கள் எட்ட உதவினார்.
பின்னர், ரோஹித் சர்மாவும் கில்லும் 74 ஓட்டங்கள் கொண்ட தொடக்கக் கூட்டணியுடன் சேஸிங்கைத் தொடங்கினர்; பின்னர் 12-வது ஓவரில் ரோஹித் சர்மா ஆட்டமிழந்தார்.
அதையடுத்து, உலகின் முதல் தர ஒருநாள் துடுப்பட்ட வீரரான கில், பின்னர் ஆட்டத்தை தன் கட்டுப்பாட்டில் கொண்டுவந்து, தனது ஆக்ரோஷமான அணுகுமுறையைத் தொடர்ந்ததோடு, ஒரு ஸ்வீப் ஷாட் மூலம் தனது 10 ஆவது ஒருநாள் சதத்தையும் எட்டினார்.
மூன்றாவது வரிசையில் களமிறங்கிய கோலி தனது 86-வது சர்வதேச சதத்தைப் பதிவு செய்தார்; மறுபுறம் கில் 108 பந்துகளில் 110 ஓட்டங்கள் குவித்தார். இவர்கள் இருவரும் இணைந்து 132 பந்துகளில் 151 ஓட்டங்கள் சேர்த்த வலுவான கூட்டணியின் மூலம் போட்டியின் வெற்றியை ஏறக்குறைய உறுதி செய்தனர்.
இறுதியில் ரோஸ்டன் சேஸ் கில்லை ஆட்டமிழக்கச் செய்தார், ஆனால் ருதுராஜ் கெய்க்வாட் 19 பந்துகளில் 13 ஓட்டங்கள் எடுத்து, மேலும் எந்தப் பிரச்சினையும் இன்றி இந்தியாவை வெற்றிக்கு அழைத்துச் செல்ல கோலிக்கு உதவினார்.
அடுத்தடுத்து பவுண்டரிகளை அடித்து கோலி வெற்றியை உறுதி செய்தார்.
கோலி சாதனை
விராட் கோலி இந்தப் போட்டியில் சர்வதேச ஒருநாள் கிரிக்கெட்டில் 15,000 ஓட்டங்களைக் கடந்தார்.
இதன் மூலம் கிரிக்கெட் ஜாம்பவான் சச்சின் டெண்டுல்கருக்கு அடுத்தபடியாக இச்சாதனையைப் படைத்த வரலாற்றின் இரண்டாவது துடுப்பட்ட வீரராகவும் அவர் மாறினார்.
நேற்யை போட்டியில் அல்சாரி ஜோசப் வீசிய பந்தை ‘மிட்-விக்கெட்’ திசையில் கம்பீரமான ‘புல் ஷாட்’ (pull shot) மூலம் நான்கு ஓட்டங்களாக மாற்றி அவர் தனது 15,000 ஆவது ஓட்டத்தைப் பூர்த்தி செய்தார்.
பின்னர், ரசிகர்களின் வரவேற்பை ஏற்கும் விதமாகத் தனது கைகளை உயர்த்தி அதை கொண்டாடினார்.
50 ஓவர் கிரிக்கெட்டில் 14,243 ஓட்டங்கள் குவித்து இதுவரை அதிக ஓட்டங்கள் எடுத்தவர்கள் பட்டியலில் மூன்றாமிடத்தில் உள்ள இலங்கை அணியின் முன்னாள் தலைவர் குமார் சங்கக்காராவை, 2025 ஒக்டோபரில் கோலி முந்தியதிலிருந்து, ஒருநாள் போட்டிகளில் அதிக ஓட்டங்கள் எடுத்தவர்கள் பட்டியலில் அவர் இரண்டாவது இடத்தில் உள்ளார்.
இந்தப் பட்டியலில் நான்காவது இடத்தில் அவுஸ்திரேலிய அணியின் முன்னாள் தலைவர் ரிக்கி பாண்டிங் உள்ளார்; இவர் 375 ஒருநாள் போட்டிகளில் 13,704 ஓட்டங்களைக் குவித்துள்ளார்.
இவரைத் தொடர்ந்து, இலங்கையின் முன்னாள் தொடக்க ஆட்டக்காரரான சனத் ஜெயசூர்யா 448 போட்டிகளில் 13,430 ஓட்டங்களுகடன் ஐந்தாவது இடத்தில் உள்ளார்.
அதேநேரம், இந்த வடிவிலான போட்டிகளில் அதிக சதங்கள் (55) அடித்த சாதனையையும் கோலி தன்வசம் வைத்துள்ளார்.
மும்பையில் நடைபெற்ற 2023 ஒருநாள் உலகக் கிண்ண அரையிறுதிப் போட்டியில் நியூசிலாந்துக்கு எதிராக அவர் தனது 50 ஆவது சதத்தை அடித்தமையும் குறிப்பிடத்தக்கது.
