கடந்த இரண்டு ஆண்டுகளில், போதைப்பொருள் கடத்தல்காரர்கள் உட்பட போதைப்பொருள் தொடர்பான நடவடிக்கைகளில் ஈடுபட்ட மொத்தம் 5,74,000 பேர் கைது செய்யப்பட்டுள்ளதாக பொதுப் பாதுகாப்பு மற்றும் நாடாளுமன்ற விவகார அமைச்சர் ஆனந்த விஜேபால தெரிவித்துள்ளார்.
நிகவெரட்டியாவில் இன்று (11) நடைபெற்ற பொதுக்கூட்டம் ஒன்றில் உரையாற்றும்போதே அமைச்சர் இக்கருத்துகளைத் தெரிவித்தார்.
இது குறித்து மேலும் விளக்கிய அவர்,
இத்தகைய நடவடிக்கைகளின் விளைவாக சட்டவிரோதக் கடத்தல்காரர்கள் சிறைக்கு அனுப்பப்பட்டு வருவதாகக் குறிப்பிட்டார்.
சட்டத்தின் ஆட்சியை நிலைநாட்டவும் பொதுமக்களின் பாதுகாப்பை உறுதிப்படுத்தவும் மேற்கொள்ளப்பட்ட நடவடிக்கைகளின் ஒரு பகுதியாக, குற்றவாளிகளிடமிருந்து சட்டவிரோதமாக வைக்கப்பட்டிருந்த 3,980 துப்பாக்கிகள் அரசின் கட்டுப்பாட்டில் கொண்டுவரப்பட்டதாக அவர் மேலும் தெரிவித்தார்.
முன்பு சீர்குலைந்திருந்த சட்டத்தின் ஆட்சியை அரசு மீண்டும் நிலைநாட்டி வருவதாகவும், சட்டவிரோதச் செயல்கள் மற்றும் பொது நிதியைத் தவறாகப் பயன்படுத்துதல் ஆகியவற்றில் ஈடுபடும் நபர்கள் மீது, அவர்களின் அந்தஸ்து எதுவாக இருந்தாலும் பாரபட்சமின்றி கடுமையான சட்ட நடவடிக்கை எடுக்கப்பட்டு வருவதாகவும் அமைச்சர் வலியுறுத்தினார்.
இதற்கிடையில், நாட்டின் நீதித்துறையில் நிலுவையில் உள்ள சுமார் 11 லட்சம் வழக்குகளின் தீர்வை விரைவுபடுத்தத் தேவையான அனைத்து நடவடிக்கைகளும் எடுக்கப்பட்டுள்ளதாக அவர் கூறினார்.
நீதிமன்றச் செயல்பாடுகளை வலுப்படுத்த நீதிமன்றங்கள் மற்றும் நீதிபதிகளின் எண்ணிக்கையை அதிகரிக்கவும் அரசு நடவடிக்கை எடுத்துள்ளது என்று அவர் மேலும் தெரிவித்தார்.
மேலும், வழக்குகளை முடிப்பதற்கான கால அளவைக் குறைக்கவும், தேவையற்ற தாமதமின்றி மக்களுக்கு நீதி கிடைப்பதை உறுதி செய்யவும் நீதிமன்றங்களின் பணி நேரம் நீட்டிக்கப்பட்டுள்ளதாக அமைச்சர் கூறினார்.
