கொழும்பு, விஹாரமகாதேவி பூங்கா வளாகத்தில் சத்தியாக்கிரகப் போராட்டத்தில் ஈடுபட்டிருந்த பலாங்கொடை கஸ்ஸப தேரர் தொடர்பில் சமூக ஊடகங்களில் பரவி வரும் காணொளி குறித்து இலங்கை பொலிஸார் விளக்கமளித்துள்ளனர்.
ஞானசார தேரரை சிறையிலிருந்து விடுவிக்கக் கோரி, நேற்று (17) கருவாத் தோட்டம் பொலிஸ் பிரிவுக்குட்பட்ட கொழும்பு விஹாரமகாதேவி பூங்கா வளாகத்தில் அமைந்துள்ள புத்தர் சிலைக்கு முன்னால் பலாங்கொடை கஸ்ஸப தேரர் தலைமையில் சத்தியாக்கிரகப் போராட்டம் ஆரம்பிக்கப்பட்டதாக பொலிஸார் தெரிவித்துள்ளனர்.
இதன்போது, கூடாரம் அமைத்து தற்காலிக மேடை ஒன்றை நிர்மாணிப்பது சட்டவிரோதமானது எனப் போராட்டத்தில் ஈடுபட்டிருந்தவர்களுக்கு அறிவுறுத்துவதற்காக பொலிஸ் அதிகாரிகள் சென்றுள்ளனர்.
இதன்போது, பலாங்கொடை கஸ்ஸப தேரர் அங்கிருந்த கான்கிரீட் படிக்கட்டில் இருந்து தவறி விழுந்து காயமடைந்துள்ளார்.
இதனையடுத்து, சிகிச்சைக்காக கொழும்பு தேசிய வைத்தியசாலையில் அனுமதிக்கப்பட்ட அவர், தற்போது வைத்தியசாலையிலிருந்து வெளியேறியுள்ளதாகத் தெரிவிக்கப்பட்டுள்ளது.
இந்தச் சம்பவத்தின்போது பொலிஸ் அதிகாரிகளால் அவர் தாக்கப்படவில்லை எனவும், தேரர் தவறி விழுந்ததன் காரணமாகவே இந்தச் சம்பவம் இடம்பெற்றதாகவும் பொலிஸார் விளக்கமளித்துள்ளனர்.
இந்நிலையில், சம்பவம் தொடர்பில் தவறான தகவல்களைப் பரப்புதல், பொதுமக்களைத் தூண்டிவிடுதல், அமைதியின்மை மற்றும் குழப்பநிலையை ஏற்படுத்துதல் போன்ற செயல்களில் ஈடுபடுவோருக்கு எதிராக சட்ட நடவடிக்கை எடுப்பதில் இலங்கை பொலிஸார் தீவிர கவனம் செலுத்தி வருவதாகவும் தெரிவிக்கப்பட்டுள்ளது.
எனவே, சமூக ஊடகங்களில் பகிரப்படும் காணொளிகள் மற்றும் தகவல்களின் உண்மைத்தன்மையை உறுதிப்படுத்தாமல் அவற்றைப் பகிர்வதைத் தவிர்க்குமாறு பொலிஸார் பொதுமக்களிடம் கேட்டுக்கொண்டுள்ளனர்.
இந்தச் சம்பவம் தொடர்பான மேலதிக விசாரணைகளை கருவாத் தோட்டம் பொலிஸார் முன்னெடுத்து வருகின்றனர்.
