பாகிஸ்தான் மற்றும் கட்டார் வழியாக ஈரானும் அமெரிக்காவும் மறைமுகப் பேச்சுவார்த்தைகளில் தொடர்ந்து ஈடுபட்டுள்ளன என்று தெஹ்ரான் வெளியுறவு அமைச்சர் அப்பாஸ் அராக்சி (Abbas Araghchi ) செவ்வாயன்று தெரிவித்தார்.
மேலும், தெஹ்ரானின் நிபந்தனைகளை வொஷிங்டன் ஏற்காத வரை ஹோர்முஸ் நீரிணை மூடப்பட்டே இருக்கும் என்றும் அவர் எச்சரித்தார்.
ஈராக்கின் ‘அல் எக்பாரியா’ (Al Ekhbariya) தொலைக்காட்சி சேவைக்கு அளித்த செவ்வியில் இது குறித்து கருத்து வெளியிட்ட அப்பாஸ் அராக்சி, ஈரான் ஏழு நாள் கால அளவிலான ஒரு திட்டத்தை முன்வைத்துள்ளதாகவும், அதன்படி ஆறாவது நாளில் அந்த முக்கியமான நீர்வழிப்பாதை முழுமையாக மீண்டும் திறக்கப்படும் என்றும் தெரிவித்தார்.
வொஷிங்டன் இந்த நிபந்தனைகளுக்கு ஒப்புக்கொண்ட போதிலும், கூடுதல் அம்சங்களைச் சேர்க்குமாறு கோரியதாக அவர் கூறினார்.
ஏனைய பிரச்சினைகளுக்குச் செல்வதற்கு முன்பு, இஸ்லாமாபாத் புரிந்துணர்வு ஒப்பந்தத்தின் கீழ் உள்ள அனைத்து கடமைகளையும் அமெரிக்கா முதலில் நிறைவேற்ற வேண்டும் என்று ஈரான் விரும்புவதாக அவர் கூறினார்.
செங்கடல் நிகழ்வுகளில் ஈரானின் ஈடுபாட்டை மறுத்த அராக்சி, அவற்றுக்கும் எங்களுக்கும் எந்த சம்பந்தமும் இல்லை என்று கூறினார்.
மேலும், அவர்களது மோதலில் மத்தியஸ்தம் செய்வதற்கான ஈரானின் முன்மொழிவுக்கு சவுதி அரேபியாவோ அல்லது யேமனின் ஹவுத்திகளோ பதிலளிக்கவில்லை என்றும் அவர் கூறினார்.
அத்துடன் யேமனில் எகிப்தின் எந்தவொரு தலையீடும் நிலைமையை மேலும் சிக்கலாக்கும் என்று எச்சரித்த அவர், தடைகள் அல்லது இராணுவ அச்சுறுத்தல்கள் அல்ல, மாறாக இராஜதந்திரமே ஒரே சாத்தியமான வழி என்றும் வலியுறுத்தினார்.
இதற்கிடையில், அமெரிக்காவுடனான பேச்சுவார்த்தைகளில் முன்வைக்கப்படக்கூடிய ஒரு முக்கிய கோரிக்கையை நிராகரித்து, செறிவூட்டப்பட்ட யுரேனியம் எதுவும் நாட்டிலிருந்து வெளியேற்றப்படாது என்று ஈரானின் உயர்மட்ட பாதுகாப்பு அதிகாரி செவ்வாயன்று கூறியதாக ஈரானிய அரசு தொலைக்காட்சி மற்றும் பல ஊடகங்கள் தெரிவித்துள்ளன.
ஈரானின் அனைத்து நிபந்தனைகளையும் முழுமையாக நிறைவேற்றுவதில் தொடங்கி, நம்பிக்கையை வளர்ப்பதற்கான நடவடிக்கைகளை வொஷிங்டன் எடுக்கும் வரை, அதனுடன் எந்தப் பேச்சுவார்த்தையும் நடைபெறாது என்றும் அவர் கூறினார்.
இந்த அறிக்கை எந்தவொரு அணுசக்தி ஏற்பாட்டிற்கும் ஒரு பெரிய தடையைச் சுட்டிக்காட்டுகிறது.
ஈரான் தனது செறிவூட்டப்பட்ட யுரேனியம் கையிருப்பை மாற்றுவதை நிராகரிக்கிறது, அதே நேரத்தில் வொஷிங்டன் ஈரானின் செறிவூட்டல் மீது கணிசமான கட்டுப்பாடுகளை விதிக்கக் கோரியுள்ளது.
அமெரிக்கத் தடையை முடிவுக்குக் கொண்டுவருவது, எண்ணெய் மீதான தடைகளைத் தளர்த்துவது மற்றும் பிராந்தியப் பகைமைகளை நிறுத்துவது ஆகியவை ஈரானின் நிபந்தனைகளில் அடங்கும் என்று கூறப்படுகிறது.
