தமிழகத்தில் உயரமான கட்டிடங்களுக்கான அதிகபட்ச உயர வரம்பை 18.30 மீற்றரிலிருந்து 19.50 மீற்றராக அதிகரித்து, ஒருங்கிணைந்த கட்டிட விதிகளில் தமிழக அரசு திருத்தம் செய்துள்ளது.
இது தொடர்பில் வீட்டுவசதித் துறைச் செயலாளர் கிர்லோஷ்குமார் வெளியிட்ட அரசாணையில் தெரிவிக்கப்பட்டுள்ளதாவது:
தமிழகத்தில் குடியிருப்பு மற்றும் குடியிருப்பு சார்ந்த பயன்பாட்டுக்கான வலயப் பகுதிகளில், 12 மீற்றர் அகலமான வீதியை ஒட்டிய காணிகள் வணிகப் பயன்பாட்டுக்கு உரியவையாகக் கருதப்படும்.
சென்னை பெருநகரப் பகுதிக்கு வெளியே 9 மீற்றர் அகலமான வீதி போதுமானதாகும். வீதியின் அகலம் தொடர்ச்சியாக 100 மீற்றர் நீளத்துக்கு இருக்க வேண்டும்.
கருத்தரங்கு மண்டபங்கள், பல்மாடி வாகனத் தரிப்பிடங்கள் மற்றும் குளிரூட்டப்பட்ட ஒற்றைத் திரையரங்குகளை அமைப்பதற்கு 12 மீற்றர் அகலமான வீதி அவசியமாகும்.
மாநகராட்சிகள் மற்றும் நகராட்சிப் பகுதிகளில் கண்காட்சி மண்டபங்கள், திருமண மண்டபங்கள் அமைப்பதற்கு 15 மீற்றர் அகலமான வீதி தேவை. ஏனைய பகுதிகளில் இதற்கான வீதி அகலம் 12 மீற்றராக இருக்க வேண்டும்.
நட்சத்திர ஹோட்டல்கள், பல்திரைத் திரையரங்குகள் மற்றும் வணிக வளாகங்களை அமைப்பதற்கு 18 மீற்றர் அகலமான வீதி இருக்க வேண்டும்.
மேலும், 12, 15 மற்றும் 18 மீற்றர் அகலமான வீதிகளுக்கு முறையே 2.0, 2.5 மற்றும் 3.25 என்ற தளப்பரப்புக் குறியீடு (FSI) நிர்ணயிக்கப்பட்டுள்ளது.
ஹோட்டல்களில் ஒவ்வொரு வாகனத் தரிப்பிடத்துக்கும் சாரதிகளுக்காக ஒரு படுக்கை வசதியை ஏற்படுத்த வேண்டும். தகவல் தொழில்நுட்ப அலுவலகங்களில் ஒவ்வொரு 75 சதுர மீற்றருக்கும் ஒரு வாகனத் தரிப்பிடத்தை ஒதுக்க வேண்டும்.
50 இற்கும் மேற்பட்ட வீடுகளைக் கொண்ட கட்டிடங்களில் மின்சார வாகனங்களுக்கான விரைவு மின்னேற்ற வசதிகளை ஏற்படுத்த வேண்டும்.
மாற்றுத்திறனாளிகளுக்கான வசதிகள் முழுமையாக ஏற்படுத்தப்பட்ட பின்னரே கட்டிட நிறைவுச் சான்றிதழ் வழங்கப்படும். நீச்சல் தடாகங்கள் தொடர்பான விதிகளிலும் திருத்தங்கள் மேற்கொள்ளப்பட்டுள்ளன.
இதற்கு மேலதிகமாக, கட்டிடங்களின் பக்கவாட்டில் விடப்பட வேண்டிய இடைவெளி தொடர்பான விதிகளிலும் திருத்தங்கள் செய்யப்பட்டுள்ளன.
