வளர்ந்து வரும் உலக அரங்கில் தனது இடத்தைத் தக்கவைத்துக்கொள்ள இலங்கை விரைவான பொருளாதார மற்றும் தொழில்நுட்ப மாற்றங்களுக்கு உள்ளாக வேண்டும் என்று முன்னாள் ஜனாதிபதி ரணில் விக்ரமசிங்க, எச்சரித்துள்ளார்.
அவ்வாறு மாற்றங்களுக்கு ஏற்பத் தன்னை மாற்றிக்கொள்ளத் தவறினால், சர்வதேச அரங்கில் இலங்கை மேலும் முக்கியத்துவமற்ற நாடாக மாறிவிடும் என்றும் அவர் எச்சரித்துள்ளார்.
திங்களன்று (26) நடைபெற்ற இலங்கை சர்வதேச வர்த்தக சம்மேளனத்தின் 50 ஆவது இணையவழிக் கருத்தரங்கில் கலந்து கொண்டு உரையாற்றும் போது அவர் இதனைக் குறிப்பிட்டார்.
இதன்போது மேலும் உரையாற்றிய முன்னாள் ஜனாதிபதி, இலங்கையானது இந்தியப் பெருங்கடலில் ஒரு கடல்சார் தளவாட மையமாகத் தன்னை நிலைநிறுத்திக் கொள்ளும் அதே வேளையில், தொழில்நுட்பம் சார்ந்த நவீனமயமாக்கல் மூலம் ஒரு வலுவான, போட்டித்தன்மை வாய்ந்த பொருளாதாரத்தை உருவாக்க வேண்டும் என்று வலியுறுத்தினார்.
இந்தியாவுடன் நெருங்கிய பொருளாதார ஒத்துழைப்பு, வங்காள விரிகுடா நாடுகள் மற்றும் தென்கிழக்கு ஆசியாவுடன் வலுவான உறவுகள், மற்றும் இறுதியில் பிராந்திய பொருளாதார ஒருங்கிணைப்பு உள்ளிட்ட இலங்கைக்கான பல முன்னுரிமைகளையும் அவர் இங்கு கோடிட்டுக் காட்டினார்.
இலங்கை பிரிக்ஸ் (BRICS) அமைப்பில் இணைய வேண்டும் என்றும், அமெரிக்கா, சீனா, ரஷ்யா மற்றும் ஜப்பான் ஆகிய நாடுகளுடனான உறவுகளை வலுப்படுத்திக்கொள்ள வேண்டும் என்றும், சர்வதேச உறவுகளில் கூடுதல் பரிவர்த்தனை சார்ந்த அணுகுமுறையைக் கையாள வேண்டும் என்றும் அவர் வலியுறுத்தினார்.
இந்தியப் பெருங்கடல் கரையோர நாடுகளின் கூட்டமைப்பு (IORA) மற்றும் பிம்ஸ்டெக் ஆகியவற்றின் செயல்திறனை மீளாய்வு செய்யவும், கொழும்பு பாதுகாப்பு மாநாட்டை விரைவுபடுத்தவும், சிறிய மற்றும் நடுத்தர அளவிலான கப்பல்களைக் கொண்ட தொழில்நுட்ப ரீதியாக மேம்பட்ட கடற்படையை உருவாக்கவும் ரணில் விக்ரமசிங்க இதன்போது மேலும் பரிந்துரைத்தார்.
இந்தியப் பெருங்கடலின் மூலோபாய முக்கியத்துவத்தை வலியுறுத்திய அவர், இலங்கை தனது பொருளாதார நலன்களைப் பாதுகாத்துக்கொள்ள வேண்டும் என்றும், குறிப்பாக சூயஸ் கால்வாய் மற்றும் வளைகுடாப் பகுதி ஆகியவற்றின் தொடர்ச்சியான செயல்பாட்டை உறுதிப்படுத்த வேண்டும் என்றும் கூறினார்.
இவை இரண்டையும் அவர் நாட்டின் இரண்டு பொருளாதார உயிர்நாடிகள் என்று விவரித்தார்.
செயற்கை நுண்ணறிவு மற்றும் வளர்ந்து வரும் தொழில்நுட்பங்களின் செல்வாக்கு அதிகரித்து வருவதைக் குறிப்பிட்ட முன்னாள் ஜனாதிபதி, தொழில்நுட்பத் திறன்கள் தேசிய இறையாண்மை மற்றும் உலகளாவிய அதிகாரத்தைத் தீர்மானிக்கும் முக்கிய காரணியாக மாறி வருகின்றன என்றும் கூறினார்.
செயற்கை நுண்ணறிவு மற்றும் கணினித் துறையில் அமெரிக்காவும் சீனாவும் ஆதிக்கம் செலுத்தும் சக்திகளாக உருவெடுத்து வருவதாகவும், அதே வேளையில் இந்தியா, ஜப்பான் மற்றும் பல ஐரோப்பிய நாடுகள் உள்ளிட்ட பிற நாடுகளும் தங்கள் தொழில்நுட்பத் திறன்களை மேம்படுத்தி வருகின்றன என்றும் அவர் சுட்டிக்காட்டினார்.
வங்காள விரிகுடாவின் பொருளாதார ஆற்றலையும், கடலுக்கடியிலான தகவல் தொடர்பு கேபிள்களைப் பாதுகாப்பதன் முக்கியத்துவத்தையும், கடல்சார் பாதுகாப்பை வலுப்படுத்துவதன் அவசியத்தையும் எடுத்துரைத்த ரணில் விக்ரமசிங்க, எந்த நடவடிக்கையும் எடுக்காமல் இருப்பது ஆபத்தானது என்று எச்சரித்தார்.
மாறிவரும் புவிசார் அரசியல் சூழலுக்கு வெளியே இலங்கை தொடர்ந்து இருக்க முடியாது என்றும் கூறினார்.
தொழில்நுட்பம் மையப் பங்கு வகிக்கும், அதே சமயம் வர்த்தகம் தொடர்ந்து முக்கியத்துவம் பெறும் ஒரு புதிய உலக ஒழுங்கமைப்பில், நாம் பிழைத்திருக்க வேண்டுமானால் இதைத்தான் செய்ய வேண்டும்.
நாம் இந்த வழியைத் தேர்ந்தெடுக்க வேண்டும்; இல்லையெனில், பசிபிக் பெருங்கடலில் உள்ள ஏதோ ஒரு சிறிய தீவைப் போல, நாம் முக்கியத்துவமற்றவர்களாக மாறி மறைந்து போவோம் என்றும் முன்னாள் ஜனாதிபதி வலியுறுத்திக் கூறினார்.
