ஞாயிற்றுக்கிழமை (25) நடைபெற்ற தேர்தலில் நீண்டகாலத் தலைவரான அலெக்சாண்டர் வுசிக்கைப் பதவியிலிருந்து அகற்றியதன் மூலம், செர்பியாவின் மாணவர் போராட்ட இயக்கம், ஐரோப்பாவின் பிற தலைநகரங்களில் உள்ள போராட்டக்காரர்கள் கனவு மட்டுமே காணக்கூடிய ஒரு சாதனையை நிகழ்த்தியுள்ளது.
ஆனால், இப்போதுதான் ஆட்சியமைத்தல் என்ற கடினமான பணி அவர்கள் முன்னால் நிற்கிறது.
இதில் மாணவர்களுக்கோ அல்லது அவர்கள் தேர்ந்தெடுத்த வேட்பாளர்களுக்கோ எந்தவித அனுபவமும் இல்லை.
இரண்டு ஆண்டுகளாக அமைதியான முறையில் நடைபெற்று வந்த அரசாங்க எதிர்ப்புப் போராட்டங்களின் உச்சகட்டமாக அமைந்த வரலாற்றுச் சிறப்புமிக்க தேர்தலில், ஞாயிற்றுக்கிழமை இரவு வுசிக் (Vucic) தனது தோல்வியை ஒப்புக்கொண்டதைக் கொண்டாடுவதற்காக, நாடு முழுவதும் பல்லாயிரக்கணக்கான மக்கள் வீதிகளில் இறங்கினர்.
ஆனால், ஆரவாரம் செய்த கூட்டம் தீப்பந்தங்களையும் வாணவேடிக்கைகளையும் கொளுத்தி, பாடி ஆடி மகிழ்ந்தபோதும், சில கேள்விகள் மனதில் நீடித்தன.
தலைவரற்ற இந்த இயக்கத்திலிருந்து பிரதமராக யார் உருவெடுப்பார், அவர்களின் கொள்கைகள் துல்லியமாக என்னவாக இருக்கும், மேலும், எந்தவொரு அரசியல் தொடர்பும் இல்லாத, அரசியல்வாதிகளாக அறியப்படாத ஒரு குழுவால் ஒன்றிணைந்து பொருளாதாரத்தை வலுப்படுத்தவும், ஊழலை வேரறுக்கவும், சிக்கலான சர்வதேச உறவுகளைச் சமாளிக்கவும் முடியுமா? – போன்ற கேள்விகள் எழுந்தன.
மேற்கு பால்கன் பிராந்தியத்தின் மிகப்பெரிய பொருளாதாரமான செர்பியாவின் அரசியல் ஸ்திரத்தன்மையையும், சீனா, ரஷ்யா மற்றும் அதன் மிகப்பெரிய வர்த்தகப் பங்காளியான ஐரோப்பிய ஒன்றியத்துடனான அதன் உறவுகளையும் இந்த பதில்கள் தீர்மானிக்கும்.
மாணவர்களின் வெற்றியானது, “ஊழல் ஒழிப்பு, சட்டத்தின் ஆட்சி மற்றும் சிறந்த பொதுச் சேவைகளை மையமாகக் கொண்ட பரந்த நிறுவன மற்றும் கொள்கை மாற்றங்களைத் தூண்டக்கூடும்.
இருப்பினும், சீர்திருத்தங்களுக்கான அதிகாரத்துவ எதிர்ப்பு மற்றும் இயக்கத்தின் வரையறுக்கப்பட்ட ஆட்சி அனுபவம் ஆகியவை இந்த மாற்றத்தை சவாலானதாக மாற்றக்கூடும்,” என்று டெனியோ குளோபல் ரிசர்ச் திங்களன்று வெளியிட்ட ஒரு அறிக்கையில் கூறியுள்ளது.
