முன்னாள் ஜனாதிபதி கோட்டாபய ராஜபக்ஷவின் வெளிநாட்டுப் பயணத் தடையை தற்காலிகமாக நீக்குமாறு கோரி தாக்கல் செய்யப்பட்ட மனு தொடர்பில், குற்றப் புலனாய்வுத் திணைக்களம் (CID) நவம்பர் 4 ஆம் திகதி நீதிமன்றத்தில் முன்னிலையாகி தனது கருத்துக்களை முன்வைக்குமாறு கொழும்பு கோட்டை நீதவான் நீதிமன்றம் இன்று (28) உத்தரவிட்டது.
முன்னாள் ஜனாதிபதிக்கு மேலதிக மருத்துவ சிகிச்சைக்காக சிங்கப்பூர் செல்வதற்கு அனுமதி கோரி, அவரது சட்டக் குழுவினர் தாக்கல் செய்த மனுவை பரிசீலித்த கொழும்பு கோட்டை நீதவான் பஸான் அமரசேன இந்த உத்தரவைப் பிறப்பித்தார்.
சிங்கப்பூரில் உள்ள மருத்துவமனையொன்றில் ஏற்கனவே மேற்கொள்ளப்பட்ட இதய அறுவை சிகிச்சையைத் தொடர்ந்து, அவருக்கு அங்கு மேலதிக சிகிச்சை தேவைப்படுவதாக சட்டத்தரணிகள் நீதிமன்றத்திற்குத் தெரிவித்தனர்.
இந்த விவகாரம் விசாரணைக்கு எடுத்துக்கொள்ளப்பட்டபோது, முன்னாள் ஜனாதிபதியும் நீதிமன்றத்தில் பிரசன்னமாகியிருந்தார்.
இருப்பினும், இந்த வழக்கின் மனுதாரராக உள்ள குற்றப் புலனாய்வுத் திணைக்களம் (CID), விசாரணையின் போது நீதிமன்றத்தில் முன்னிலையாகவில்லை.
இதற்கமைய, பயணத் தடையை தற்காலிகமாக நீக்குவது தொடர்பான கோரிக்கை குறித்து தமது நிலைப்பாட்டை முன்வைப்பதற்காக, நவம்பர் 4 ஆம் திகதி நீதிமன்றத்தில் முன்னிலையாகுமாறு குற்றப் புலனாய்வுத் திணைக்களத்திற்கு நீதவான் உத்தரவிட்டார்.
ஈஸ்டர் ஞாயிறு பயங்கரவாதத் தாக்குதல்கள் தொடர்பான விசாரணைகளின் ஒரு பகுதியாக, முன்னாள் ஜனாதிபதி கோட்டாபய ராஜபக்ஷ மற்றும் சில முன்னாள் புலனாய்வு அதிகாரிகள் மீது வெளிநாட்டுப் பயணத் தடை விதிக்கப்பட்டிருந்தது.
