சர்வதேச கிரிக்கெட் நிர்வாகத்தின் (ICC) தலைவராக ஜெய் ஷா (Jay Shah) இரண்டாவது முறையாக ஒருமனதாக மீண்டும் தேர்ந்தெடுக்கப்பட்டுள்ளார்.
இங்கிலாந்து, சிம்பாப்வே, நியூசிலாந்து மற்றும் இதர உறுப்பு நாடுகளைச் சேர்ந்த கிரிக்கெட் நிர்வாகிகள், விளையாட்டின் மிக முக்கியமான காலகட்டத்தில் அவரது தொடர்ச்சியான தலைமைத்துவத்திற்கு ஆதரவு தெரிவித்துள்ளனர்.
36 வயதில் ஐசிசி தலைவரான மிக இளைய நபரான ஜெய் ஷா, முதன்முதலில் 2024 ஆகஸ்ட் 27 அன்று போட்டியின்றி தேர்ந்தெடுக்கப்பட்டார்.
கிரெக் பார்க்லேவுக்குப் பிறகு, அதே ஆண்டு டிசம்பர் 1 அன்று அவர் பதவியேற்றார்.
பாலியில் நடைபெற்ற ஐசிசி வாரியக் கூட்டங்களின் போது, ஐசிசி பணிப்பாளர்கள் முன்வைத்த பரிந்துரையைத் தொடர்ந்து, அவர் மீண்டும் அப்பதவிக்கு நியமிக்கப்பட்டார்.
2028-ஆம் ஆண்டு லாஸ் ஏஞ்சல்ஸில் நடைபெறவிருக்கும் ஒலிம்பிக் போட்டிகளில் கிரிக்கெட் மீண்டும் இடம்பெறத் தயாராகி வரும் வேளையில், ஐசிசியானது இந்த விளையாட்டின் உலகளாவிய தடத்தை விரிவுபடுத்தவும், சர்வதேசப் போட்டிகளை வலுப்படுத்தவும், வளர்ந்து வரும் கிரிக்கெட் நாடுகளுக்கு அதிக வாய்ப்புகளை உருவாக்கவும் முயன்று வருகிறது.
இவரது இரண்டாவது பதவிக்காலம் இந்த நிகழ்வில் அமைகிறது.
ஐசிசி தலைவராக, கிரிக்கெட்டின் வணிக வளர்ச்சியை அதன் பல்வேறு உறுப்பு நாடுகளின் நலன்களுடன் சமநிலைப்படுத்தும் சவாலை ஜெய் ஷா எதிர்கொள்ள வேண்டியிருந்தது.
நூறாண்டுகளுக்கும் மேலான இடைவெளிக்குப் பிறகு ஒலிம்பிக் போட்டிகளில் கிரிக்கெட் மீண்டும் இடம்பெறுவது, அவரது இரண்டாவது பதவிக்காலத்தில் ஒரு முக்கிய வாய்ப்பாக அமையும்.
இருப்பினும், லாஸ் ஏஞ்சல்ஸ் 2028 ஒலிம்பிக் போட்டிகளில் கிரிக்கெட்டைச் சேர்ப்பதற்கான நடவடிக்கைகள், ஜெய் ஷா பொறுப்பேற்பதற்கு முன்பே, ஐசிசியின் முந்தைய ஒலிம்பிக் முயற்சிகளின் மூலமாகவே உறுதிசெய்யப்பட்டிருந்தன.
விளையாட்டின் அடித்தளத்தை வலுப்படுத்துதல், மகளிர் கிரிக்கெட்டின் தொடர்ச்சியான வளர்ச்சியை ஆதரித்தல், இணை உறுப்பினர்களுக்கான (Associate Members) வாய்ப்புகளை விரிவுபடுத்துதல், சர்வதேச கிரிக்கெட்டின் நேர்மையைப் பாதுகாத்தல் மற்றும் நிலையான வணிக வாய்ப்புகளை உருவாக்குதல் ஆகியவற்றைத் தனது முக்கிய முன்னுரிமைகளாக ஐசிசி அடையாளம் கண்டுள்ளமையும் குறிப்பிடத்தக்கது.















