இலங்கை பொலிஸாருக்காக முன்மொழியப்பட்டுள்ள புதிய சீருடை, கனேடிய பொலிஸார் அணியும் சீருடையை ஒத்த வகையில் சாம்பல் நிற சட்டை மற்றும் நீல நிற கால்சட்டையைக் கொண்டிருக்கலாம் எனத் தெரிவிக்கப்படுகிறது.
இந்த புதிய சீருடை வடிவமைப்பு தொடர்பில் பரிசீலிக்கப்பட்டு வரும் பல்வேறு தெரிவுகளில் இதுவும் ஒன்றென, பொலிஸ் உள்வட்டாரங்களை மேற்கோள்காட்டி டெய்லி நியூஸ் பத்திரிகை செய்தி வெளியிட்டுள்ளது.
இதன்படி, 2027ஆம் ஆண்டு ஜூன் மாதம் முதல் புதிய சீருடையை அறிமுகப்படுத்துவதற்குத் திட்டமிடப்பட்டுள்ளது.
2027ஆம் ஆண்டுக்கான வரவு செலவுத் திட்டத்தை சமர்ப்பித்தபோது, நவீன தொழில்நுட்ப உபகரணங்களுடன் கூடிய புதிய பொலிஸ் சீருடை அறிமுகப்படுத்தப்படும் என ஜனாதிபதி அநுரகுமார திஸாநாயக்க அறிவித்திருந்தார்.
இலங்கையின் காலநிலைச் சூழலுக்கு ஏற்ற வகையிலும், பொலிஸாருக்கு வசதியானதாகவும் இந்தப் புதிய சீருடை வடிவமைக்கப்படும் எனவும் ஜனாதிபதி குறிப்பிட்டிருந்தார்.
பொலிஸ் சீருடையை மாற்றுவதற்கான அதிகாரம் ஜனாதிபதிக்கே உள்ளதாகவும், அதற்கான நடவடிக்கைகள் தற்போது முன்னெடுக்கப்பட்டு வருவதாகவும் பொலிஸ் மா அதிபர் பிரியந்த வீரசூரிய டெய்லி நியூஸ் பத்திரிகைக்குத் தெரிவித்துள்ளார்.
காலனித்துவ காலத்தில் அறிமுகப்படுத்தப்பட்ட தற்போதைய காக்கி நிறச் சீருடை, இலங்கையின் வெப்பமண்டல காலநிலைக்கு ஏற்றதாக இல்லை என்றும், அதன் கனமான துணியினால் பொலிஸார் அசௌகரியங்களை எதிர்கொள்வதாகவும் நீண்டகாலமாகக் குற்றச்சாட்டுகள் முன்வைக்கப்பட்டு வருகின்றமை குறிப்பிடத்தக்கது.

















