சேலத்தில் நடைபெறும் தி.மு.க.வின் மாபெரும் தேர்தல் பிரசாரப் பொதுக்கூட்டத்தில் காங்கிரஸ் கட்சியின் முன்னாள் தலைவர் ராகுல் காந்தி பங்கேற்கிறார்.
மதசார்பற்ற முற்போக்கு கூட்டணியின் வேட்பாளர்களை ஆதரித்து சேலம், சீலன்நாயக்கன்பட்டியில் எதிர்வரும் 28ஆம் திகதி ஞாயிற்றுகிழமை மாலை 4 மணிக்கு இந்த பொதுக்கூட்டம் நடைபெறுகிறது.
ராகுல்காந்தி – மு.க.ஸ்டாலின் உள்ளிட்ட அனைத்துக் கட்சி கூட்டணி தலைவர்கள் இந்தக் கூட்டத்தில் பங்கேற்கவுள்ளனர்.
இந்த பிரமாண்ட பொதுக்கூட்டத்திற்கு தி.மு.க. தலைவர் மு.க.ஸ்டாலின் தலைமை தாங்குகிறார். குறித்த கூட்டத்தில் அகில இந்திய காங்கிரஸ் கட்சியின் முன்னாள் தலைவர் ராகுல் காந்தி பங்கேற்று சிறப்புரையாற்றுகிறார்.
இந்த கூட்டத்தில் கூட்டணி கட்சிகளை சேர்ந்த தமிழக காங்கிரஸ் தலைவர் கே.எஸ்.அழகிரி, ம.தி.மு.க பொதுச்செயலாளர் வைகோ, திராவிட கழக தலைவர் கி.வீரமணி, உள்ளிட்ட பலர் கலந்துகொண்டு உரையாற்றவுள்ளனர்.
தமிழக சட்டசபை தேர்தல் எதிர்வரும் 6ஆம் திகதி நடைபெறவுள்ளமை குறிப்பிடத்தக்கது.
