இலங்கை- மேற்கிந்திய தீவுகள் அணிகளுக்கிடையிலான முதல் டெஸ்ட் சமநிலையில் நிறைவு!

இலங்கை மற்றும் மேற்கிந்திய தீவுகள் அணிகளுக்கிடையிலான முதலாவது டெஸ்ட் போட்டி வெற்றி தோல்வியின்றி சமநிலையில் முடிவடைந்துள்ளது.

ஆண்டிகுவா மைதானத்தில் கடந்த ஞாயிற்றுக்கிழமை ஆரம்பமான இப்போட்டியில், நாணய சுழற்சியில் வெற்றிபெற்ற மேற்கிந்திய தீவுகள் அணி முதலில் களத்தடுப்பை தீர்மானித்தது.
இதன்படி முதலில், முதல் இன்னிங்ஸிற்காக துடுப்பெடுத்தாடிய இலங்கை அணி, 169 ஓட்டங்களுக்கு சுருண்டது.

இதன்போது அணியின் அதிகப்பட்ச ஓட்டங்களாக, திரிமன்னே 70 ஓட்டங்களையும் டிக்வெல்ல 32 ஓட்டங்களையும் பெற்றுக்கொண்டனர்.

மேற்கிந்திய தீவுகள் அணியின் பந்துவீச்சில், ஜேஸன் ஹோல்டர் 5 விக்கெட்டுகளையும் கெமர் ரோச் 3 விக்கெட்டுகளையும் கோர்ன்வோல் 1 விக்கெட்டினையும் வீழ்த்தினர்.

இதனைத்தொடர்ந்து பதிலுக்கு முதல் இன்னிங்சை தொடங்கிய மேற்கிந்திய தீவுகள் அணி, 271 ஓட்டங்களை பெற்றுக்கொண்டது.

இதன்போது அணியின் அதிகப்பட்ச ஓட்டங்களாக, கோர்ன்வோல் 61 ஓட்டங்களையும் மேயர்ஸ் 45 ஓட்டங்களையும் பெற்றுக்கொண்டனர்.

இலங்கை அணியின் பந்துவீச்சில், சுரங்க லக்மால் 5 விக்கெட்டுகளையும் விஷ்வ பெனார்டோ மற்றும் சமீர ஆகியோர் தலா 2 விக்கெட்டுகளையும் எம்புல்தெனிய 1 விக்கெட்டினையும் வீழ்த்தினர்.

இதனைத்தொடர்ந்து 102 ஓட்டங்கள் பின்னிலையில் இரண்டாவது இன்னிங்சை தொடங்கிய இலங்கை அணி, 476 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, அறிமுக வீரரான பெத்தும் நிசங்க 103 ஓட்டங்களையும் டிக்வெல்ல 96 ஓட்டங்களையும் ஒசேத பெனார்டோ 91 ஓட்டங்களையும் பெற்றுக்கொண்டனர்.

மேற்கிந்திய தீவுகள் அணியின் பந்துவீச்சில், கெமார் ரோச் மற்றும் கோர்ன்வோல் ஆகியோர் தலா 3 விக்கெட்டுகளையும் மேயர்ஸ் 2 விக்கெட்டுகளையும் அல்சார்சி ஜோசப் 1 விக்கெட்டினையும் வீழ்த்தினர்.

இதன்படி 375 ஓட்டங்கள் வெற்றி இலக்கை நோக்கி இரண்டாவது இன்னிங்சை தொடங்கிய மேற்கிந்திய தீவுகள் அணி, போட்டியின் இறுதிநாள்வரை களத்தில் தாக்குபிடித்தது.

மேற்கிந்திய தீவுகள் அணி, 4 விக்கெட்டுகள் இழப்புக்கு 236 ஓட்டங்களை பெற்றுக்கொண்டது.
இதன்போது அணியின் அதிகப்பட்ச ஓட்டங்களாக, போனர் ஆட்டமிழக்காது 113 ஓட்டங்களையும் கெய்ல் மேயர்ஸ் 52 ஓட்டங்களையும் பெற்றுக்கொண்டனர்.

இலங்கை அணியின் பந்துவீச்சில், விஸ்வ பெனார்டோ மற்றும் லசித் எம்புல்தெனிய ஆகியோர் தலா 2 விக்கெட்டுகளையும் வீழ்த்தினர்.

இப்போட்டியின் ஆட்டநாயகனாக, முதல் இன்னிங்ஸில் 31 ஓட்டங்களையும் ஆட்டமிழக்காது 113 ஓட்டங்களையும் பெற்றுக்கொண்ட போனர் தெரிவுசெய்யப்பட்டார்.

இரு அணிகளுக்கிடையிலான இரண்டாவது டெஸ்ட் போட்டி, எதிர்வரும் 29ஆம் திகதி ஆண்டிகுவா மைதானத்தில் நடைபெறவுள்ளது.