மோடி அரசு ஒவ்வொரு நிலைகளிலும் தோல்வி அடைந்துள்ளது – காங்கிரஸ் விமர்சனம்!

மோடி அரசு ஒவ்வொரு நிலைகளிலும் தோல்வி அடைந்துள்ளது. மக்களின் நம்பிக்கைக்கு பெரும் துரோகம் விளைவித்துள்ளது என காங்கிரஸ் கட்சி விமர்சனம் செய்துள்ளது.

பிரதமர் நரேந்திர மோடியின் அரசாங்கம் பொறுப்பேற்று ஏழு ஆண்டுகள் ஆகியுள்ள நிலையில், தவறுகள் என்ற தலைப்பில் காங்கிரஸ் கட்சி பல்வேறு விமர்சனங்களை வெளியிட்டுள்ளது.

இது குறித்து காங்கிரஸ் கட்சியின் முன்னாள் தலைவர் ராகுல் காந்தி வெளியிட்டுள்ள ருவிட்டர் பதிவில், “ஒவ்வொரு மாதமும் எந்தவித முக்கியத்துவமும் இல்லாத வகையில் பேசுவதை தவிர்த்து கொரோனாவுக்கு எதிரான நடவடிக்கையை சரியான நோக்கத்துடனும், கொள்கைகளுடனும், உண்மையான அர்ப்பணிப்புடனும் நீங்கள் மேற்கொள்ள வேண்டும்” எனத் தெரிவித்துள்ளார்.

அதேநேரம் காங்கிரஸ் பொதுச் செயலாளரும், தலைமை செய்தித் தொடர்பாளருமான ரண்தீப் சுர்ஜேவாலா வெளியிட்டுள்ள பதிவில் மோடி அரசு நாட்டுக்கு தீங்கானது. மக்களின் நம்பிக்கைக்கு அரசு துரோகம் செய்துள்ளது’ எனக் குறிப்பிட்டுள்ளார்.

மேலும் பாரத் மாதாவின் கதை என்ற தலைப்பில் 7 ஆண்டுகள் ஆட்சியில் அரசு செய்த தவறுகள் மற்றும் தோல்விகளை பட்டியலிட்டு காணொலி ஒன்றையும் காங்கிரஸ் கட்சி வெளியிட்டுள்ளது.