அசர்பைஜான் கிராண்ட் பிரிக்ஸ்: செர்ஜியோ பெரெஸ் முதலிடம்!

பர்முயுலா-1 கார்பந்தயத்தின் அசர்பைஜான் கிராண்ட் பிரிக்ஸ் சுற்றில், ரெட் புல் அணியின் செர்ஜியோ பெரெஸ் முதலிடம் பிடித்துள்ளார்.

ஒவ்வொரு ஆண்டும் ‘பார்முலா 1’ கார் பந்தயம், 23 சுற்றுகளாக நடைபெறும். ஒவ்வொரு சுற்றும் ஒவ்வொரு நாடுகளில் நடைபெறும்.

இதன்படி, நடப்பு ஆண்டின் ஆறாவது சுற்றான அசர்பைஜான் கிராண்ட் பிரிக்ஸ், நேற்று பகு சிட்டி சர்வதேச ஓடுதளத்தில் நடைபெற்றது.

இதில் 306.049 கிலோ மீட்டர் பந்தய தூரத்தை நோக்கி, 10 அணிகளை சேர்ந்த 20 வீரர்கள் காரில் சீறிப்பாய்ந்தனர்.

இதில் ரெட் புல் அணியின் செர்ஜியோ பெரெஸ், பந்தய தூரத்தை 2 மணித்தியாலங்கள் 13 நிமிடங்கள் 36.410 வினாடிகளில் இலக்கை கடந்து முதலிடத்தை பிடித்தார். இதற்காக அவருக்கு 25 புள்ளிகள் வழங்கப்பட்டது.

அவரை விட 01.385 வினாடிகள் பின்தங்கிய நிலையில், பந்தய தூரத்தை கடந்த, அஸ்டன் மார்டின் அணியின் வீரர் செபஸ்டியன் வெட்டல் இரண்டாவது இடத்தை பெற்றார். அத்தோடு அவர், இரண்டாம் இடத்திற்கான 18 புள்ளிகளையும் பெற்றுக் கொண்டார்.

02.762 வினாடிகள் பின்தங்கிய நிலையில், பந்தய தூரத்தை கடந்த அல்பா டவுரி அணியின் வீரரான பியர் கேஸ்லி மூன்றாவது இடத்தை பிடித்தார். அதற்கு அவருக்கு 15 புள்ளிகள் வழங்கப்பட்டது.

இதுவரை நடைபெற்று முடிந்துள்ள ஆறு சுற்றுகளின் முடிவில், மேக்ஸ் வெர்ஸ்டபேன் இரண்டு வெற்றிகளுடன் 105 புள்ளிகளுடன் முதலிடத்தில் உள்ளார்.

இதற்கு அடுத்தப்படியாக லீவிஸ் ஹெமில்டன் மூன்று வெற்றிகளுடன் 101 புள்ளிகளுடன் இரண்டாவது இடத்தில் உள்ளார்.

ரெட் புல் அணியின் செர்ஜியோ பெரெஸ் ஒரு வெற்றியுடன் 69 புள்ளிகளுடன் மூன்றாவது இடத்திற்கு முன்னேறியுள்ளார்.

அடுத்த ஏழாவது சுற்றான கனேடியன் கிராண்ட் பிரிக்ஸ், எதிர்வரும் 13ஆம் திகதி, கில்லஸ் வில்லெனுவே சர்வதேச ஓடுதளத்தில் நடைபெறவுள்ளது.