சிம்பாப்வே அணிக்கெதிரான மூன்றாவதும் இறுதியுமான ரி-20 போட்டியில், பங்களாதேஷ் அணி 5 விக்கெட்டுகளால் வெற்றிபெற்றுள்ளது.
இந்த வெற்றியின் மூலம் மூன்று போட்டிகள் ரி-20 தொடரை 2-1 என்ற கணக்கில் பங்களாதேஷ் அணி கைப்பற்றியுள்ளது.
ஹராரே மைதானத்தில் நேற்று (ஞாயிற்றுக்கிழமை) நடைபெற்ற இப்போட்டியில், சிம்பாப்வே அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய சிம்பாப்வே அணி நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 193 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, மாதேவரே 54 ஓட்டங்களையும் சக்காப்வா 48 ஓட்டங்களையும் பெற்றுக்கொண்டனர்.
பங்களாதேஷ் கிரிக்கெட் அணியின் பந்துவீச்சில், சௌமியா சர்கார் 2 விக்கெட்டுகளையும் சய்பூதின், சொரிபுல் இஸ்லாம் மற்றும் சகிப் அல் ஹசன் ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து 194 என்ற வெற்றி இலக்கை நோக்கி பதிலுக்கு களமிறங்கிய பங்களாதேஷ் அணி, 19.2 ஓவர்கள் நிறைவில் 5 விக்கெட்டுகள் இழப்புக்கு வெற்றி இலக்கை கடந்தது. இதனால் பங்களாதேஷ் அணி 5 விக்கெட்டுகளால் வெற்றிபெற்றது.
இதன்போது அணியின் அதிகப்பட்ச ஓட்டங்களாக சௌமியா சர்கார் 68 ஓட்டங்களையும் மொஹமதுல்லா 34 ஓட்டங்களையும் பெற்றுக்கொண்டனர்.
சிம்பாப்வே அணியின் பந்துவீச்சில், பிளெஸிங் முஸரபானி மற்றும் லுக் ஜோங்வே ஆகியோர் தலா 2 விக்கெட்டுகளையும் வெலிங்டன் மசகட்சா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 2 விக்கெட்டுகளையும் 68 ஓட்டங்களையும் பெற்றுக்கொண்ட பங்களாதேஷ் அணியின் சௌமியா சர்கார் தெரிவுசெய்யப்பட்டார். அத்துடன் தொடரின் நாயகனாகவும் சௌமியா சர்கார் தெரிவுசெய்யப்பட்டார்.
முன்னதாக சிம்பாப்வே அணிக்கெதிரான நடைபெற்ற டெஸ்ட் மற்றும் ஒருநாள் தொடர்களை பங்களாதேஷ் அணி கைப்பற்றியிருந்தமை குறிப்பிடத்தக்கது.
