விடுமுறையிலிருந்த மட்டக்களப்பு மாநகரசபையில் கடமையாற்றிவரும் காரியாலய உதவியாளரை காரியாலயத்துக்கு வரவழைத்து அவர் மீது மாநகரசபை ஆணையாளர் தாக்குதல் மேற்கொண்டுள்ளதாக தெரிவிக்கப்படுகின்றது.
இன்று(வியாழக்கிழமை) மாலை 5.30 மணியளவில் இடம்பெற்ற குறித்த சம்பவத்தின் போது படுகாயமடைந்தவர் சிகிச்சைகளுக்காக வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்துள்ளனர்.
மாநகரசபையில் காரியாலய உதவியாளராக கடமையாற்றிவரும் ஜனார்த்தன் இன்றைய தினம் விடுமுறையில் வீட்டில் இருந்துள்ளார்.
இந்த நிலையில் மாலை 5.30 மணிக்கு மாநகரசபை ஆணையாளர் காரியாலயத்துக்கு வருமாறு அழைத்ததையடுத்து அவர் அங்கு சென்றுள்ளார்.
காரியாலயத்தில் ஆணையாளர் தலைமையில் ஒரு திட்டமிடல் கூட்டம் இடம்பெற்றுக் கொண்டிருந்த போது அங்சென்ற காரியாலய உதவியாளரிடம் நீ என்ன மக்களிடம் பணம் பெற்றுக்கொள்கின்றாயா என ஆணையாளர் கேட்டுள்ளார்.
இதன்போது அவர் தாம் அப்படி வாங்கவில்லை எனவும், முடிந்தால் பணம் பெற்றுக்கொண்டமையினை நிரூபிக்குமாறும் கோரியுள்ளார்.
இதனையடுத்து காரியால உதவியாளரின் மீது ஆணையாளர் தாக்குதல் மேற்கொண்டதுடன், அவர் அணிந்திருந்த ரீசேட்டை கிழித்துள்ளதாக கூறப்படுகின்றது.
இதன்போது காயமடைந்த உதவியாளர் மட்டுபோதனா வைத்தியசாலையில் அவசர சிகிச்சைப்பிரிவில் அனுமதிக்கப்பட்டுள்ளதாக பொலிஸாரின் ஆரம்பகட்ட விசாரணையில் தெரியவந்துள்ளது.
அதேவேளை காரியாலய உதவியாளர் தன்னை தாக்கியதாக தெரிவித்து மாநகரசபை ஆணையாளர் வைத்தியசாலையில் அனுமதிக்கப்பட்டுள்ளார்.
இது தொடர்பான மேலதிக விசாரணைகளை மட்டக்களப்பு தலைமையக பொலிஸார் மேற்கொண்டு வருகின்றனர்.
