ரஷித் கானின் சிறப்பான பங்களிப்பால் அயர்லாந்தை வீழ்த்தியது ஆப்கானிஸ்தான் அணி!

அயர்லாந்து அணிக்கெதிரான நான்காவது ரி-20 போட்டியில், ஆப்கானிஸ்தான் அணி 27 ஓட்டங்கள் வித்தியாசத்தில் வெற்றிபெற்றது.

இந்த வெற்றியின் மூலம் ஐந்து போட்டிகள் கொண்ட ரி-20 தொடர், 2-2 என்ற கணக்கில் சமநிலைப் பெற்றுள்ளது.

பெல்பாஸ்டில் நேற்று (திங்கட்கிழமை) நடைபெற்ற இப்போட்டியில், மழைக் குறுக்கிட்டதன் காரணமாக போட்டி 11 ஓவர்களாக மட்டுப்படுத்தப்பட்டது.

இதனைத்தொடர்ந்து, நாணய சுழற்சியில் வெற்றிபெற்ற அயர்லாந்து அணி முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய ஆப்கானிஸ்தான் அணி, நிர்ணயிக்கப்பட்ட 11 ஓவர்கள் நிறைவில், 6 விக்கெட்டுகள் இழப்புக்கு 132 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, நஜிபுல்லா 50 ஓட்டங்களையும் ரஷித்கான் ஆட்டமிழக்காது 31 ஓட்டங்களையும் பெற்றுக்கொண்டனர்.

அயர்லாந்து அணியின் பந்துவீச்சில், டெலானி 3 விக்கெட்டுகளையும் மார்க் அடாயர், மெக்கார்தி மற்றும் ஹேண்ட் ஆகியோர் தலா 1 விக்கெட்டினை வீழ்த்தினர்.

இதனைத்தொடர்ந்து 133 என்ற வெற்றி இலக்கை நோக்கி பதிலுக்கு களமிறங்கிய அயர்லாந்து அணியால், 11 ஓவர்கள் நிறைவில் அனைத்து விக்கெட்டுகளையும் இழந்து 105 ஓட்டங்களை மட்டுமே பெற முடிந்தது. இதனால், ஆப்கானிஸ்தான் அணி 27 ஓட்டங்கள் வித்தியாசத்தில் வெற்றிபெற்றது.

இதன்போது அணியின் அதிகப்பட்ச ஓட்டங்களாக, ஜோர்ஜ் டொக்ரெல் ஆட்டமிழக்காது 41 ஓட்டங்களையும் போல் ஸ்டெயர்லிங் 20 ஓட்டங்களையும் பெற்றுக்கொண்டனர்.

ஆப்கானிஸ்தான் அணியின் பந்துவீச்சில், பாரரீட் அஹமத் மாலிக் 3 விக்கெட்டுகளையும் நவின் உல் ஹக் மற்றும் ரஷித்கான் ஆகியோர் தலா 2 விக்கெட்டுகளையும் ஒமர்ஷாய் 1 விக்கெட்டினையும் வீழ்த்தினர்.

இப்போட்டியின் ஆட்டநாயகனாக ஆப்கானிஸ்தான் அணி சார்பில், ஆட்டமிழக்காது 31 ஓட்டங்களையும் 2 விக்கெட்டுகளையும் வீழ்த்திய ரஷித்கான் தெரிவுசெய்யப்பட்டார்.