ரி-20 உலகக்கிண்ணத் தொடரின் 13ஆவது லீக் போட்டி- முதலாவது சுப்பர்-12 போட்டியில், அவுஸ்ரேலிய அணியை வீழ்த்தி நியூஸிலாந்து அணி 89 ஓட்டங்களால் அபார வெற்றிபெற்றுள்ளது.
சிட்னி மைதானத்தில் இன்று (சனிக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற அவுஸ்ரேலிய அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய நியூஸிலாந்து அணி, நிர்ணயிக்கப்பட்ட 20 ஓவர்கள் நிறைவில் 3 விக்கெட்டுகள் இழப்புக்கு 200 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, டெவோன் கோன்வே ஆட்டமிழக்காது 92 ஓட்டங்களையும் பின் அலென் 42 ஓட்டங்களையும் பெற்றுக்கொண்டனர்.
அவுஸ்ரேலிய அணியின் பந்துவீச்சில், ஜோஸ் ஹெசில்வுட் 2 விக்கெட்டுகளையும் ஆடம் செம்பா 1 விக்கெட்டினையும் வீழ்த்தினர்.
இதனைத்தொடர்ந்து 201 என்ற வெற்றி இலக்கை நோக்கி பதிலுக்கு களமிறங்கிய அவுஸ்ரேலியா அணி, 17.1 ஓவர்கள் நிறைவில் 111 ஓட்டங்களுக்கு சுருண்டது. இதனால், நியூஸிலாந்து அணி 89 ஓட்டங்களால் அபார வெற்றிபெற்றது.
இதன்போது அணியின் அதிகப்பட்ச ஓட்டங்களாக, க்ளென் மேக்ஸ்வெல் 28 ஓட்டங்களையும் பெட் கம்மின்ஸ் 21 ஓட்டங்களையும் பெற்றுக்கொண்டனர்.
நியூஸிலாந்துக் கிரிக்கெட் அணியின் பந்துவீச்சில், டிம் சவுத்தீ மற்றும் மிட்செல் சான்ட்னர் ஆகியோர் தலா 3 விக்கெட்டுகளையும் ட்ரெண்ட் போல்ட் 2 விக்கெட்டுகளையும் லொக்கி பெர்குசன் மற்றும் இஷ் சோதி ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 58 பந்துகளில் 2 சிக்ஸர்கள் 7 பவுண்ரிகள் அடங்களாக ஆட்டமிழக்காது 92 ஓட்டங்களை பெற்றுக்கொண்ட டெவோன் கோன்வே தெரிவுசெய்யப்பட்டார்.
