ஜோர்ஜிய நாடாளுமன்றத்திற்கு வெளியே ஆயிரக்கணக்கான எதிர்ப்பாளர்கள் அந்நாட்டு அரசாங்கத்திற்கு எதிராக மாபெரும் எதிர்ப்பு பேரணியை நடத்தினர்.
நேற்று (ஞாயிற்றுக்கிழமை) தலைநகர் திபிலிசியில் உள்ள நாடாளுமன்ற கட்டடத்திற்கு வெளியே ஆர்ப்பாட்டக்காரர்கள் ஜோர்ஜிய, உக்ரைனிய மற்றும் ஐரோப்பிய ஒன்றியக் கொடிகளை அசைத்து, ஐரோப்பிய எதிர்காலத்திற்காக என்று எழுதப்பட்ட ஒரு பெரிய பதாகையை ஏந்தியிருந்தனர்.
போராட்டத்தில் கலந்து கொண்டவர்கள் மீது பொலிஸார், தண்ணீர் பீரங்கி மற்றும் மிளகுத்தூள் தெளிப்பான்களை பிரயோகம் செய்தனர்.
சிறையில் அடைக்கப்பட்டுள்ள முன்னாள் ஜனாதிபதி மிகைல் சாகாஷ்விலிக்கு ஆதரவாக பிரதான எதிர்க்கட்சி இந்த பேரணியை ஏற்பாடு செய்திருந்தது.
மேலும், ஆளும் ஜோர்ஜியன் ட்ரீம் கட்சி, ரஷ்யாவின் கட்டுப்பாட்டில் இருப்பதாகவும், ஜனநாயகத்திற்கு பின்வாங்குவதாகவும் விமர்சகர்கள் குற்றம் சாட்டுகின்றனர்.
அரசியல் எதிரிகளை சிறையில் அடைப்பதாகவும், சுதந்திரமான ஊடகங்களை வாயடைப்பதாகவும் அரசாங்கம் குற்றம் சாட்டியுள்ளது.
2004 மற்றும் 2013ஆம் ஆண்டுகளுக்கு இடையில் இரண்டு முறை ஜனாதிபதியாக பதவி வகித்த சாகாஷ்விலி, தற்போது அதிகார துஷ்பிரயோகத்திற்காக ஆறு ஆண்டுகள் சிறைத்தண்டனை அனுபவித்து வருகிறார், இருப்பினும் சர்வதேச உரிமைகள் குழுக்கள் அவரது தண்டனையை அரசியல் நோக்கத்துடன் கண்டித்துள்ளன.
கடந்த மாதம், வெகுஜன எதிர்ப்புக்கள், வெளிநாட்டில் இருந்து பணம் பெறும் எந்தவொரு அரசு சாரா நிறுவனமும் ‘வெளிநாட்டு செல்வாக்கின் முகவராக’ பதிவு செய்ய வேண்டிய ஒரு சட்டமூலத்தை கைவிடுமாறு அரசாங்கத்தை கட்டாயப்படுத்தியது.
எதிர்ப்பை அடக்குவதற்காக 2012இல் ரஷ்யாவில் அறிமுகப்படுத்தப்பட்ட சட்டமூலத்தை மாதிரியாகக் கொண்டு இந்த சட்டமூலம் உருவாக்கப்பட்டுள்ளது என்றும், இது சர்வாதிகாரத்தை நோக்கிய ஒரு படி என்றும் எதிர்ப்பாளர்கள் தெரிவித்தனர்.
பெப்ரவரி 2022இல் ரஷ்யா உக்ரைனை ஆக்கிரமித்த சில நாட்களுக்குப் பிறகு ஜோர்ஜியா, உக்ரைன் மற்றும் மால்டோவாவுடன் இணைந்து ஐரோப்பிய ஒன்றிய உறுப்பினராக விண்ணப்பித்தது.
ஜூன் மாதம், ஐரோப்பிய ஒன்றியம் உக்ரைன் மற்றும் மால்டோவாவை வேட்பாளர் உறுப்பு நாடுகளாக முறைப்படி பெயரிட்டது, ஆனால் ஜோர்ஜியா அந்தஸ்து வழங்குவதற்கு முன்பு பல அரசியல் மற்றும் நீதித்துறை சீர்திருத்தங்களை செயல்படுத்த வேண்டும் என்று கூறியது.
ஜோர்ஜியாவில் பொதுக் கருத்து, பெருமளவில் ஐரோப்பிய ஒன்றியத்திற்கு ஆதரவாக உள்ளது, மேலும் ஐரோப்பிய ஒன்றியத்தில் சேருவதற்கான முயற்சியில் உள்ளது. ஆனால், இதற்கு சில இடையூறுகள் இருப்பதாக எதிர்ப்பாளர்கள் கூறுகின்றனர்.
