ஐசிசி ஒருநாள் போட்டிகளுக்கான துடுப்பாட்ட வீரர்கள் தரவரிசை பட்டியல் வெளியிடப்பட்டுள்ளது. இதில் உலகக்கோப்பை தொடரில் சிறப்பான ஆட்டத்தை வெளிப்படுத்திய விராட் கோலி மற்றும் கேப்டன் ரோஹித் சர்மா முன்னேற்றம் கண்டுள்ளனர். இளம் நட்சத்திரம் சுப்மன் கில் தொடர்ந்து முதலிடத்தில் நீடித்து வருகிறார்.
நடந்து முடிந்த உலகக்கோப்பை தொடரில் 11 போட்டிகளில் விளையாடிய விராட் கோலி 765 ஓட்டங்களை குவித்துள்ளார். இதைத் தொடர்ந்து ஐசிசி தரவரிசை பட்டியலில் 791 புள்ளிகளைப் பெற்ற விராட் கோலி 3 ஆம் இடத்திற்கு முன்னேறியுள்ளார். 769 புள்ளிகளைப் பெற்றுள்ள ரோஹித் சர்மாவுக்கு 4 ஆம் இடம் வழங்கப்பட்டுள்ளது.
826 புள்ளிகளுடன் சுப்மன் கில் முதலிடத்தையும், 824 புள்ளிகளுடன் பாகிஸ்தான் அணியின் பாபர் ஆசம் 2 ஆம் இடத்தையும் பிடித்துள்ளனர். நடந்து முடிந்த உலகக்கோப்பை தொடருடன் ஓய்வை அறிவித்த தென்னாப்பிரிக்க அணியின் குவின்டன் டி காக் 760 புள்ளிகளைப் பெற்று 5 ஆம் இடத்தை பெற்றுள்ளார். நியூசிலாந்து அணியின் டேரில் மிட்செலுக்கு 6 ஆம் இடமும், ஆஸ்திரேலியாவின் டேவிட் வார்னருக்கு 7 ஆம் இடமும், தென்னாப்பிரிக்காவின் வான்டர் டசனுக்கு 8 ஆம் இடமும் அளிக்கப்பட்டுள்ளது.
இதேபோன்று பந்து வீச்சாளர் பட்டியலில் தென்னாப்பிரிக்க அணியின் கேஷவ் மகாராஜ் 741 புள்ளிகளுடன் முதலிடத்தையும், ஆஸ்திரேலியாவின் ஜோஷ் ஹேசல்வுட் 703 புள்ளிகளுடன் 2 ஆம் இடத்தையும், இந்திய அணியின் முகம்மது சிராஜ் 699 புள்ளிகளுடன் 3 ஆம் இடத்தையும் பிடித்துள்ளனர்.
அணிகளைப் பொருத்தளவில் ஒருநாள், டி20 மற்றும் டெஸ்ட் போட்டி தொடர்களில் இந்திய அணி முதலிடத்தை தக்க வைத்துள்ளது.
